اسلام آباد(آئی این پی ) ملک کے مختلف شہروں میں پولیو مہم کا آغاز ہوگیا ،چھ روز مہم کے دوران22 لاکھ سے زائد پانچ سال سے کم عمر بچوں کو پولیو کے قطرے پلائے جائیں گے۔تفصیلات کے مطابق انسداد پولیو مہم سرگودھا، ملتان، لودھراں، وہاڑی، خانیوال، حافظ آباد اور راجن پور کے

اضلاع میں شروع ہوگئی ہے، جبکہ خیبرپختونخوااور فاٹا میں انسداد پولیو مہم کے دوران چھیاسٹھ لاکھ سے زائد بچوں کو مہلک بیماری سے بچا کے قطرے پلائے جائیں گے۔بلوچستان میں بھی پانچ سال تک کی عمر کے چوبیس لاکھ بچوں کواورگلگت بلتستان میں دو لاکھ تینتالیس ہزار سے زائد بچوں کوانسداد پولیو کے قطرے پلائے جائیں گے۔ اسی طرح آزادجموں وکشمیر میں مجموعی طورپر سات لاکھ اڑتالیس ہزار نوسواڑتالیس بچوں کو پولیو سے بچائو اور وٹامن اے کے قطرے پلائے جائیں گے۔کسی بھی ناخوشگوار واقعے سے بچنے کے لئے سکیورٹی کے جامع انتظامات کئے گئے ہیں۔ صرف خیبرپختونخواہ میں تیس ہزار سے زائد اہلکار سیکیورٹی کے فرائض انجام دے رہے ہیں۔واضح رہے کہ شہر قائد میں بھی سولہ ستمبر چھ روزہ انسدا د پولیو مہم جاری ہے، چھ روز مہم کے دوران بائیس لاکھ سے زائد پانچ سال سے کم عمر بچوں کو پولیو کے قطرے پلائے جائیں گے۔