وین ٹیائن(آئی این پی) چین اور لائوس فوجی شعبے میں اعلیٰ سطح کے دوطرفہ تعلقات اور تبادلوں کو فروغ دینے پر رضامند ہو گئے ہیں ، یہ فیصلہ چین کے سٹیٹ کونسلر اور وزیر دفاع چینگ وان کوآن کے دورہ لائوس کے موقع پر کیا گیا ، آپ نے چار روزہ دورے کے دوران چینی وزیر دفاع نے
لائوس کی انقلابی پارٹی کے جنرل سیکرٹری برائے سینٹرل کمیٹی اور لائوس کے صدر بائون ہینگ گورا چت سے ملاقاتیں کیں اور لائوس کے وزیر دفاع سے بھی تبادلہ خیالات کیا ۔چینی وزیر دفاع نے چین لائوس پہلے اعلیٰ سطح سرحدی اجلاس کی بھی صدارت کی جس میں لائوس کے وزیر دفاع بھی شریک تھے ، فریقین نے دونوں ملکوں کی افواج کے درمیان دوستانہ اور تعاون پر مبنی تعلقات میں پیشرفت پر اطمینان کا اظہار کیا اور اس بات کا عزم کیا کہ دونوں ملکوں اور پارٹیوں کے درمیان جن اہم معاملات پر اتفاق رائے ہو چکا ہے ان پر عملدرآمد کیا جائے گا ، یہ بات ایک مشترکہ بیان میں کہی گئی ہے جو گذشتہ روز یہاں جاری کیا گیا۔بیان میں کہا گیا ہے کہ چین اور لائوس کی پہلی اعلیٰ سطح سرحدی میٹنگ کامیاب رہی ہے جس میں دونوں افواج کے درمیان اتحاد اور دوستی کو نمایاں کیا گیا ہے ، اجلاس میں امن کے قیام ، دوستی مستحکم اور پرامن سرحدوں کے سلسلے میں بھی دونوں ملکوں کے
کردار کی تعریف کی گئی ۔ دونوں ممالک کے وزرائے دفاع نے اس بات پر اتفاق کیا کہ دونوں ممالک دہشتگردی کیخلاف مشترکہ گشتی ٹیمیں تشکیل دینگے ۔چینی وزیر دفاع نے لائوس میں اپنے قیام کے دوران نیشنل ڈیفنس اکیڈمی کا بھی دورہ کیا اور لائوس میں چینی شہدا کی یاد گار پر بھی حاضری
دی ۔
