ریاض،واشنگٹن،سڈنی،برسلز،اسلام آباد (آن لائن)پاکستان میں عید الاضحیٰ آج مذہبی جوش و جذبے سے منائی جارہی ہے۔گزشتہ روزسعودی عرب سمیت خلیجی ممالک، امریکا، یورپ، آسٹریلیا اور مشرق بعید میں کروڑوں مسلمانوں نے عید الاضحیٰ کا تہوار مذہبی جوش و جذبے سے منا یا
جبکہ پاکستان میں عید الاضحیٰ آج منائی جارہی ہے۔مسلمانوں نے نمازعید کی ادائیگی کے بعد سنت ابراہیمی پرعمل کرتے ہوئے اللہ کی رضا اورخوشنودی کے لیے جانوروں کی قربانی کی۔ قربانی کی ادائیگی کے بعد مسلمان اپنی اپنی مقامی روایات کے مطابق عید کی خوشیاں دوبالا کرنے کے لیے مختلف تقاریب کا اہتمام کیا گیا۔قربانی کا سلسلہ تین روز تک جاری رہے گا۔ دریں اثناء قومی ادارہ برائے انسدادِ دہشت گردی (نیکٹا) نے عیدالاضحیٰ کے موقع پر ملک بھر میں سیکیورٹی ہائی الرٹ کرنے کا فیصلہ کیا ہے۔ نیکٹا ترجمان کے مطابق وزارت داخلہ کی ہدایت پر ملک بھر میں نیم فوجی دستے ہائی الرٹ ہوں گے اورآ ج علی الصبح وزارت داخلہ کا ائیرونگ بھی الرٹ رہے گا۔نیکٹا کے مطابق چاروں صوبائی حکومتوں کو وزارت داخلہ کی جانب سے ہدایات جاری کی گئی ہیں کہ وہ انٹیلی جنس رپورٹس کو سنجیدگی سے لیں اور عید کی نماز کے اجتماعات چار دیواری کے اندر منعقد کرنے کو یقینی بنائیں اور اجتماعات کی سیکیورٹی کو ہائی الرٹ رکھیں۔نیکٹا کا کہناہے کہ چاروں صوبوں کے پی ڈی ایم ایز کو مراسلہ جاری کردیا گیا ہے کہ عید کے اجتماعات کی مخصوص جگہوں پر مناسب سیکیورٹی کا بندوبست کیا جائے قربانی کی کھالیں بغیر این او سی اکھٹی کرنے والوں کے خلاف کارروائی کی جائے۔
