اسلا آباد(نیوزڈیسک)یمن میں محصور 176 پاکستانی شہریوں کو کو لے کر پی آئی اے کا طیارہ بے نظیر انٹرنیشنل ایئرپورٹ پہنچ گیا۔پی آئی اے کی ایئر بس 310 یمن میں محصور 176 پاکستانیوں کو جبوتی سے لے کر پاکستان واپس پہنچی جنہیں چینی بحری جہاز کے ذریعے عدن سے جبوتی پہنچایا گیا تھا۔ اسلام آباد ایئرپورٹ پہنچنے پر وزیر دفاع خواجہ آصف، مشیر ہوا بازی شجاعت عظیم اور چیرمین پی آئی اے نے مسافروں کا استقبال کیا۔اس موقع پر خواجہ آصف نے میڈیا سے بات کرتے ہوئے کہا کہ یمن سے زیادہ تر پاکستانیوں کو نکال لیا گیا ہے، اگر صنعا ایئرپورٹ آپریشنل ہوا تو وہاں سے بھی پاکستانیوں کو نکالا جائے گا اور امید ہے اگلے 2 دنوں میں تمام پاکستانیوں کو واپس لے آئیں گے۔ ان کا کہنا تھا کہ چند سو پاکستانی مکلا، صنعا اور حدیدہ میں اب بھی موجود ہیں جنہیں جلد از جلد نکالنے کے لئے اقدامات کئے جارہے ہیں۔واضح رہے کہ یمن کی کشیدہ صورت حال کے باعث وزیراعظم کی خصوصی ہدایت پر محصور پاکستانیوں کی واپسی کے لئے خصوصی انتظامات کئے گئے ہیں اور چند روز قبل بھی پی آئی اے کی خصوصی پرواز کے ذریعے 502 شہریوں کو وطن واپس پہنچایا گیا۔