اسلام آباد (مانیٹرنگ ڈیسک،آئی این پی)نوازشریف کا قافلہ گزشتہ رات جب گجرات پہنچا تو مارو ی میمن سابق وزیر اعظم کی گاڑی پر چڑھ گئیں،وہ گاڑی پر کھڑی ہو کر نعرے لگواتی رہیں،ایک موقع پر انہوں نے شیر کا ماڈل گاڑی کے گرد جمع کارکنوں کی طرف پھینکا۔ کارکنوں نے پولیس کا
سکیورٹی حصار توڑنے کی کوشش کی ، جس پر کارکنان اور پولیس کے درمیان دھکم پیل ہوئی۔ قافلے کی گاڑیاں بار بار آپس میں ٹکراتی رہیں جس کے باعث نوازشریف کی گاڑی میں ڈینٹ پڑ گئے۔نوازشریف کا قافلہ اب لاہور کی جانب گامزن ہے۔دریں اثناسابق وزیر اعظم نواز شریف کی لاہور آمد کے پیش نظر میٹرو بس سروس کا روٹ محدود کردیا گیا جبکہ داتا دربار اور کچہری روڈ سے ملحقہ سڑکیں بھی بند کر دی گئی تھیں۔ نجی ٹی وی کے مطابق میٹرو بس انتظامیہ نے بتایا کہ نواز شریف کے اپنے مشن جی ٹی روڈ کے چوتھے روز ممکنہ طور پر لاہور پہنچنے کے پیش نظر میٹرو بس سروس کو جزوی طور پر معطل کردیا گیا ۔ گجومتہ سے شاہدرہ تک چلنے والی میٹرو اب گجومتہ سے ایم اے او کالج تک چلے گی۔ دوسری جانب نواز شریف کی لاہور آمد کے باعث داتا دربار، کچہری روڈ اور شاہدرہ سے ملحقہ سٹرکیں عام ٹریفک کیلئے بند کردی گئیں۔ ترجمان ٹریفک پولیس کا کہنا تھا کہ آنے اور جانے والی ٹریفک کیلئے سڑک کی دوسری طرف کھلی رکھی گئی ۔
