اسلام آباد(مانیٹرنگ ڈیسک)سابق وزیر اعظم میاں نوازشریف ایک رات جہلم میں قیام کے بعد گجرات پہنچ گئے جہاں انہوں نے مسلم لیگ کے کارکنوں سے خطاب کیا۔ نوازشریف نے اس موقع پر خوب دل کی بھڑاس نکالی ۔نوازشریف کا خطاب کرتے ہوئے کہنا تھا ایک منتخب وزیر اعظم کو ہٹا کر کروڑوں ووٹوں کی توہین کی گئی ۔ پہلی دفعہ مجھے صدر نے فارغ کیا۔
دوسری مرتبہ مشرف نے منتخب حکومت کا تختہ الٹا اب سپریم کورٹ نے مجھے نااہل کر دیا۔ مجھے بتائیں کیا کرنا چاہئے کیا ہونا چاہئے ۔تقدیر بدلنے کیلئے آپ کو نوازشریف کا ساتھ دینا ہوگا ۔آج پاکستان میں امن قائم ہو رہا ہے ۔کراچی میں امن آگیا ہے یہ صرف ہمارے دور حکومت میں ہوا۔جس کی لاٹھی اس کی بھینس نہیں ہوسکتی۔اس موقع پر انہوں نے کارکنوں سے سوال کیا کہ کیا آپ کو عدالتی فیصلہ قبول ہے جس پر نہیں نہیں کے نعرے گونج اٹھے۔
