کراچی: صوبائی وزیر جیل خانہ جات منظور حسین وسان نے کہاکہ کراچی سینٹرل جیل اب محفوظ نہیں رہی۔ اسے سپر ہائی وے پر منتقل کرنے کا فیصلہ کر لیا ہے۔ انہوں نے کہا کہ غوثیہ کالونی کے مکانات کو جیل کی سیکورٹی کے لیے مسمار کر دیا جائیگا۔ صوبائی وزیر نے بتایا کہ حیدر آباد جیل پر بھی ایسے ہی حملے کا خطرہ ہے۔ انہوں نے کہا کہ سندھ میں تین نئی جیلوں کی تعمیر کا پی سی ون تیار ہے۔ منظور وسان کا کہنا تھا کہ وہ جیل سے قیدی فرار کرانے کے لیے تیار کی گئی سرنگ دیکھ کر پریشان ہو گئے۔ انہوں نے بتایا کہ سندھ حکومت کو خط لکھا جائے گا کہ سپر ہائی وے پر جیل کے لیے جگہ فراہم کی جائے۔