اسلام آباد(این این آئی)جتنا گر سکتے ہو گرجاؤ،میں گھبرانے والا نہیں،پاکستان تحریک انصاف کے سربراہ عمران خان نے عائشہ گلا لئی کے الزامات کو مسترد کر تے ہوئے کہا ہے کہ الزامات کی سیاست کرنا (ن )لیگ کا وطیرہ ہے،مستقبل میں بھی ایسے کردار کشی کے حملے ناکام ہوں گے ٗ( ن )لیگ اب کردار کشی کا آخری ہتھیار آزما رہی ہے ٗحکمران جماعت سیاسی، اخلاقی اور قانونی طور پر منہدم ہوگئی ہے،
ن لیگ اربوں ڈالر ضبط ہونے کے ڈر سے کسی بھی حد تک گر سکتی ہے۔ نجی ٹی وی کے مطابق وہ پارٹی کے مشاورتی اجلاس میں گفتگو کررہے تھے اجلاس میں عائشہ گلا لئی کی طرف سے عمران خان اور ان کے قریبی ساتھیوں پر لگائے گئے الزامات کا جائزہ قانونی ٹیم کی موجودگی میں لیا گیا جبکہ اس پر حکمت عملی بارے سوچ بچار کیا گیا ہے۔ذرائع کے مطابق عمران خان نے اپنے حق میں مظاہرہ کرنے والی خواتین کو قابل فخر قرار دیا جبکہ ان کا کہنا تھا کہ ن لیگ ہمیشہ سے اوچھے ہتھکنڈے استعمال کرکے مخالفیں کی ذاتی زندگی کو متنازعہ بنانے کی کوشش میں رہتی ہے جسے ہم ناکام کریں گے۔ انہوں نے کہا کہ مسلم لیگ ن ضمیروں کی سوداگر ہے انہوں نے بے نظیر بھٹو کی ذات پر بھی کیچڑاچھالا تھا اور اب یہ سلسلہ ہم تک پہنچ گیا ہے۔انہوں نے کہا کہ تحریک انصاف کی خواتین نے ن لیگ کا مکروہ چہرہ بے نقاب کیاجس پر فخر کرتے ہیں ہماری خواتیں با اختیار اور قابل احترام ہیں۔ تحریک انصاف کے مشاورتی اجلاس میں شاہ محمود قریسی ، نعیم الحق ، شفقت محمود اور دیگر نے شرکت کی۔
