لاہور (این این آئی )وزیر اعلیٰ پنجاب کے صاحبزادے اور مسلم لیگ (ن) کے سینئر رہنما حمزہ شہباز شریف نے میاں عطا ء محمد مانیکا سے ملاقا ت کر کے ان کے تحفظات سے آگاہی حاصل کی اور انہیں وزارت سے استعفیٰ واپس لینے کیلئے آمادہ کرنے کی کوشش کی ۔ ذرائع کے مطابق میاں عطاء محمد مانیکا نے اپنی گفتگو کے دوران اپنے تحفظات سے آگاہ کرتے ہوئے کہا کہ بے اختیار وزارت کو خزانے پر بوجھ سمجھتا ہوں ۔
انہوں نے کہا کہ وزارت سے استعفیٰ دیا ہے مسلم لیگ (ن) کو کسی صورت نہیں چھوڑوں گا ۔ حمزہ شہباز شریف نے عطاء مانیکا کو تحفظات دور کرنے اور شکایات کے ازالے کی یقین دہانی کراتے ہوئے کہا کہ آپ ہمارے بڑے اور پارٹی کااثاثہ ہیں۔ایک اور ذرائع کے مطابق میاں عطاء مانیکا اپنی مشکلات کے حل کیلئے انتخابی حلقے سے آنے والوں اور وزارت سے متعلق عوام کی شکایات کے حل بارے بیورو کریسی کے رویے سے شدید نالاں ہیں اور بیورو کریسی کا رویہ ہی عطاء مانیکا کے استعفے کا بنیادی سبب ہے ۔
