اسلام آباد(مانیٹرنگ ڈیسک)عمران خان اپنے گھر میں موجود ہے، حکومت گرفتار کر لے، سپریم کورٹ کےباہر ترجمان تحریک انصاف نعیم الحق حکومت پر برس پڑے۔ تفصیلات کے مطابق تحریک انصاف کے ترجمان نعیم الحق نے پانامہ جے آئی ٹی عملدرآمد کیس کے موقع پر سپریم کورٹ کے باہر میڈیا نمائندوں سے گفتگو کرتے ہوئے کہا ہے کہ حکومت کی جانب سے کہا جا رہا ہے کہ عمران خان عدالت نہیں آتے کیونکہ انہیں گرفتاری کا خوف ہے، میں یہاں یہ کہتا ہوں کہ اگر حکومت
عمران خان کو گرفتار کرنا چاہتی ہے تو وہ اپنے گھر میں موجود ہیں انہیں وہاں سے گرفتارکر لے۔ اس موقع پر انہوں نے حکومت کے اتحادی جمعیت علمائے اسلام (ف)کے مولانا فضل الرحمن اور محمود خان اچکزئی کو ابن الوقت قرار دیتے ہوئے ان پر شدید تنقید کی ان کا کہنا تھا کہ بلوچستان کا وزیراعلیٰ ثنا اللہ زہری، مولانا فضل الرحمن اور محمود خان اچکزئی نے اپنے ضمیر نواز شریف کو فروخت کر دئیے ہیں ، تحریک انصاف انتخابات جیت کر ان ابن الوقتوں کو کٹہرے میں لائے گی۔
