اسلام آباد(آئی این پی )پاکستان الیکٹرانک میڈیا ریگولیٹری اتھارٹی (پیمرا)نے کیبل آپریٹرز کو ایک غیرقانونی چینل ’وصال اردو‘ کے خلاف خبردار کرتے ہوئے تنبیہ کی ہے کہ مذکورہ ٹی وی چینل کی نشریات دکھانے پر سخت قانونی کاروائی کی جائیگی۔ اتھارٹی نے مذکورہ چینل کو لائسنس جاری نہیں کیا ۔ یہ بات ریگولیٹر کے نوٹس میں آئی ہے کہ ’وصال اردو ‘ کے ذریعے ملک میں نفرت کا پرچار کیا جارہا ہے اور عوام الناس کو ایک خاص فرقے کے خلاف تشدد پر اکسا یا جارہا ہے۔

مذکورہ چینل برطانیہ سے ایک غیر ملکی سیٹلائٹ آپریٹر ’ایشیا سیٹ 7‘کے ذریعے پاکستان میں اپنی نشریات دکھا رہا ہے جو کہ ایک غیر قانونی عمل ہے اور صرف وہی لوگ اس کی نشریات دیکھ سکتے ہیں جن کے پاس غیر قانونی سیٹلائٹ ڈش انٹینا موجود ہیں ۔ اگرچہ ’ایشیا سیٹ 7‘ پیمر اکے دائرہ اختیار میں نہیں آتا تاہم اتھارٹی اِس کی انتظامیہ سے مذکورہ چینل کی نشریات فوری طور پر روکنے کے لئے رابطہ کر رہی ہے ۔ اسی طرح پاکستان ٹیلی کمیونیکیشن اتھارٹی (پی ٹی اے) کے ساتھ بھی ’وصال اردو‘ کی ویب سائٹ بلاک کرنے کے لئے رابطہ کیا جارہا ہے اگرچہ پیمرا نے کیبل آپریٹرز کو ’وصال اردو‘کی نشریات فوری طور پر روکنے کی ہدایات جاری کر دی ہیں تاہم اگر ناظرین اپنی ٹی وی سکرین پر مذکورہ چینل کی نشریات دیکھیں تو فور ی طور پر متعلقہ کیبل آپریٹر کے خلاف شکایت اُس کے نام، علاقہ و دیگر معلومات کے ساتھ پیمرا کو ارسال کریں یہ شکایت پیمرا کی ویب سائٹ www.pemra.gov.pk یا پیمرا کے 24/7کمپلینٹ کال سنٹر پر ٹال فری نمبر 0800-73672 پر بھی کی جاسکتی ہے۔ صارفین پیمرا کے ٹوئٹر اکاؤنٹ @reportpemra پر بھی اپنی شکایات درج کرا سکتے ہیں۔