اسلام آباد(نیوز ڈیسک)فلسطین کے مقبوضہ مغربی کنارے میں ”یوم الارض“ کی مناسبت سے فلسطینی شہریوں کی جانب سے نکالے گئے ایک پرامن جلوس پر اسرائیلی فوج نے طاقت کا وحشیانہ استعمال کیا جس کے نتیجے میں درجنوں افراد زخمی ہو گئے۔ زخمیوں میں کئی غیرملکی انسانی حقوق کے کارکن اور رضاکار بھی شامل ہیں۔العربیہ ڈاٹ نیٹ کے مطابق فلسطینی شہریوں نے”یوم الارض“ کی مناسبت سے مغربی کنارے کے وسطی شہر رام اللہ میں النبی صالح کے مقام پر صہیونی ریاست کی توسیع پسندی کے خلاف احتجاجی ریلی نکالی۔ صہیونی فوجیوں نے حسب معمول فلسطینی ریلی پر اشک آور گیس کی اندھا دھند شیلنگ کی جس کے نتیجے میں دم گھٹنے بھی کئی افراد متاثر ہوئے ہیں۔خیال رہے کہ النبی صالح قصبے کے ایک بڑے حصے پر قابض اسرائیلی فوج نے پانچ سال قبل غاصبانہ قبضہ کرلیا تھا، جس کے بعد سے فلسطینی شہر اپنی اراضی کو واگزار کرانے کے حق میں ہفتہ وار احتجاجی مظاہرے کرتے آ رہے ہیں۔یہ بات قابل ذکر ہے کہ تیس مارچ سنہ 1976ءکو قابض صہیونی فوجیوں نے مغربی کنارے میں فلسطینیوں کی ہزاروں ایکڑ زرعی اراضی پر قبضہ کرلیا تھا۔ فلسطینی ہرسال تیس مارچ کو”یوم الارض“ کے طور پر مناتے ہیں۔