اسلام آباد (مانیٹرنگ ڈیسک) چین روس تعلقات اس وقت عروج پر ہیں، یہ بات چین کے صدر شی جن پنگ روسی دورے سے قبل اپنے ایک انٹرویو میں کہی ان کا کہنا تھا کہ دونوں ملک ایک دوسرے کے انتہائی قابل اعتماد اور دفاعی شراکت دار ہیں، دونوں ملکوں نے سیاسی اور دفاعی تعلقات اعلیٰ سطح پر قائم کیے ہیں، چین اور روس نے ابھی تک سرحد سے متعلق اپنے بہت سے مسائل حل نہیں کیے

لیکن ان مسائل کوتاریخ پر چھوڑ دیا ہے۔ انہوں نے کہا کہ دونوں ملکوں کے درمیان 4300کلومیٹر طویل سرحد دونوں ملکوں کے عوام کے درمیان دوستی کی ضمانت ہے۔ صدر شی جن پنگ نے کہا کہ چین اور روس نے اعلیٰ سطح پر تبادلے اور مختلف شعبوں میں تعاون کے لیے روسی صدر ولادی میر پیوٹن اور میں نے ایک اچھی ورکنگ ریلیشن شپ قائم کر لی ہے اس کے علاوہ ہمارے درمیان دوستی کا رشتہ ہے۔ چینی صدر نے کہا کہ میں جلد ہی روسی صدر کی دعوت پر روس کا دورہ کروں گا اور مجھے یقین ہے کہ میرے دورے سے دونوں ملکوں کے تعلقا ت میں مزید اضافہ ہو گا۔ شی جن پنگ نے کہا کہ جب سے روسی صدر اور میرے درمیان بیلٹ اینڈ روڈ منصوبے کے بارے میں یوریشین اکنامک یونین تک اہم اتفاق رائے ہوا ہے، اس سے توانائی، تجارت، سرمایہ کاری، اعلیٰ ٹیکنالوجی، مالیات، بنیادی ڈھانچے اور زراعت کے شعبوں میں تعاون میں پیشرفت ہو رہی ہے، انہوں نے کہا کہ چین صدر پیوٹن کے ساتھ مل کر صحت مندانہ ترقیاتی تعلقات کو فروغ دینے کے لیے تیار ہے۔ دونوں ممالک تعلقات کے فروغ کے لیے کام کر رہے ہیں۔