اسلام آباد (مانیٹرنگ ڈیسک) قطر سعودی عرب تنازعہ، جرمنی کے وزیر خارجہ زیگمار گابرئیل سعودی عرب پہنچ گئے، تفصیلات کے مطابق جرمن وزیر خارجہ کے مطابق قطر تنازعہ عرب ممالک کے مفاد میں نہیں ہے، عرب ریاستوں کا اتحاد وقت کی اہم ضرورت ہے، رائٹرز کی ایک رپورٹ کے مطابق جرمن وزیر خارجہ زیگمار گابرئیل نے کہا کہ عرب ممالک کی قطر پر پابندیوں سے دوحہ کی حاکمیت کو کوئی خطرہ نہیں ہے۔ رائٹرز کے مطابق جرمنی کے وزیر خارجہ قطر اور عرب ممالک کے تنازعے کو حل کرانے کے لیے سعودی عرب پہنچ گئے ہیں اور
اپنے تین روزہ دورے کے دوران وہ سعودی عرب کے بعد متحدہ عرب امارات، کویت اور قطر بھی جائیں گے۔ سعودی عرب کے دارالحکومت ریاض پہنچنے سے پہلے میڈیا نمائندوں سے گفتگو کرتے ہوئے انہوں نے کہا کہ شدت پسند تنظیموں کو مالی مدد فراہم نہ کرنے سے متعلق معاہدہ کرنے سے قطر اور خلیجی ممالک کے درمیان تنازعہ ختم ہو سکتا ہے۔ انہوں نے کہا کہ خلیجی ممالک خطے کی ایک اہم طاقت ہیں اور انہیں آپس میں مل کر رہنا چاہیے۔انہوں نے کہا کہ برلن حکومت کی خواہش ہے کہ خلیجی ممالک کے اس بحران کو پرامن مذاکرات کے ذریعے حل کیا جائے۔
