مقبوضہ بیت المقدس(این این آئی)فلسطین سے تعلق رکھنے والے 13 سالہ ‘اسپائیڈر مین’ نے جسمانی لچک کاعالمی ریکارڈ اپنے نام کرلیا۔میڈیارپورٹس کے مطابق محمد الشیخ نامی یہ لڑکا غزہ کا رہائشی ہے اور اسے اسپائیڈر مین کے نام سے جانا جاتا ہے۔

اس بچے کی پیدائش انتہائی لچکدار ریڑھ کی ہڈی کے ساتھ ہوئی تھی۔ڈاکٹروں نے بچے کی ماں کو بتایا تھا کہ وہ ایک نایاب مگر بے ضرر عارضے کا شکار ہے۔یہ بچہ اپنے جسم کو انتہائی حد تک موڑنے کی صلاحیت رکھتا ہے۔اسی طرح وہ خود کو کسی بھی جانب موڑ سکتا ہے۔اس بچے نے ‘عرب گوٹ ٹیلنٹ’ نامی شو میں شرکت بھی کی جس میں اسے تیسرا انعام ملا۔رواں برس کے آغاز میں اس بچے نے اردن میں گنیز بک آف ورلڈ ریکارڈ اپنے نام کیا۔اس بچے کا عزم ہے کہ وہ مستقبل میں شہرت حاصل کرنے کے ساتھ ساتھ دنیا بھر میں اپنا نام کمائے گا۔تاہم ابھی وہ غزہ میں موجود ہے اور ساحل پر لوگوں کو اپنے فن سے محظوظ کرتا رہتا ہے۔