اسلام آباد (آن لائن) چیئرمین تحریک انصاف عمران خان نے کہا ہے کہ نواز لیگ اور موٹو گینگ نے پانامہ کیس کی جوائنٹ انوسٹی گیشن ٹیم جے آئی ٹی کی تشکیل پر جشن منایا لیکن اب قابو میں نہ آنے پر اسے بدنام کرنے کی سازش کررہے ہیں ان کو منہ کی کھانا پڑے گی اور انصاف کا بول بولا ہوگا انہوں نے یہ بات پیر کوسماجی رابطے کی ویب سائٹ ٹویٹر پر اپنے بیان میں کہی ۔ عمران خان نے کہا کہ نواز لیگ اور اس کے
موٹو گینگ نے پہلے پانامہ کیس کی تحقیقات کیلئے جے آئی ٹی کی تشکیل پر فتح کے نشان بنائے اور مٹھائیاں تقسیم کرکے یہ تاثر قائم کرنے کی کوشش کی کہ شریف خاندان کیخلاف کوئی ثبوت سامنے نہ آسکا اور شریف برادران یہ کیس جیت گئے ہیں لیکن وہ جشن کو بہت جلد بھول گئے، انہوں نے کہا کہ جے آئی ٹی نے سچائی کے حصول کے لئے نواز شریف اور شہباز شریف سمیت ان کے صاحبزادوں و خاندان کے دیگر افراد سے کڑی تفتیش شروع کی تو ان کے حواس باختہ ہوگئے اور جوں جوں تحقیقات مکمل ہونے جارہی ہے تو نواز لیگ اور موٹو گینگ جے آئی ٹی کیخلاف سازش کرکے اسے بدنام کررہے ہیں ان کو منہ کی کھانا پڑے گی ۔
