کراچی (نیوزڈیسک)یمن میں محصور پاکستانیوں کو وطن واپس لانے کے لیے قومی ایئرلائن کی پہلی خصوصی پرواز کی روانگی مزید تاخیر کا شکار ہوگئی ہے۔ یمن کے مختلف علاقوں میں 3 ہزار پاکستانی موجود ہیں جن میں سے ایک ہزار افرادیمن کے شورش زدہ علاقوں میں رہائش پذیر ہیں اور وطن واپس آنا چاہتے ہیں۔ پاکستانی سفارت خانے کی کوششوں سے 600 افراد پر مشتمل پہلا قافلہ حدیدہ پہنچ گیا ہے۔ پاکستانیوں کی وطن واپسی کے لئے کراچی ایئرپورٹ پر قومی ایئرلائن کے دو طیارے مخصوص کردیئے گئے ہیں جن میں سے پہلی خصوصی پرواز پی کے 7001 حدیدہ روانہ ہونے کے لئے تیار ہے جسے کیپٹن محسن آپریٹ کررہے ہیں، پرواز کے ذریعے 504 افراد کو واپس لایا جائے گا تاہم سیکیورٹی کلئیرنس نہ ہونے کی وجہ سے روانگی میں تاخیر کا سامنا کرنا پڑ رہا ہے۔ اس کے علاوہ پاک بحریہ کے 2 جہاز یمن سے پاکستانیوں کے محفوظ انخلا کے لیے بحیرہ احمر پہنچ رہے ہیں۔واضح رہے کہ یمن میں حوثی باغیوں کی پیش قدمی روکنے کے لئے سعودی عرب کی سربراہی میں خلیجی ممالک کا اتحاد فضائی کارروائی کررہا ہے۔