سن 90 ھ میں جب مسجد نبوی کی توسیع کا کام مکمل ہو گیا تو سن 91 ھ میں ولید نے حج بیت اللہ کا ارادہ کیا اور اپنی آمد کے بارے میں سیدنا عمر بن عبدالعزیزؒ کو آگاہ کیا۔ جب ولید حج کے لیے دمشق سے نکلا تو حضرت عمرؒ ایک عظیم الشان جلوس کے ساتھ خلیفہ کے استقبال کے لیے روانہ ہوئے۔ اس جلوس میں مدینہ منورہ کے اکابر میں سے بیس حضرات شامل تھے۔ اس جلوس میں اونٹوں اور گھوڑوں پر لدا ہوا کافی سامان بھی تھا۔ یہ
جلوس سویدا تک گیا۔ خلیفہ مسلمین سواری پر تھے۔ خلفاء کے آداب میں یہ بات شامل تھی کہ اگر لوگ خلیفہ کی آمد کے وقت سوار ہوں تو خلیفہ کو دیکھ کر سواریوں سے اتر جائیں اور اگر بیٹھے ہوں تو کھڑے ہو جائیں لیکن اس جلوس کے لوگ خلیفہ کو دیکھ کر اپنی سواریوں سے نہ اترے۔ پھر ولید نے گورنر مدینہ حضرت عمرؒ کو اپنے پاس بلایا اور ان کے ساتھ چلتا رہا حتیٰ کہ ذی خشب میں جو مدینہ منورہ سے ایک دن کے فاصلے پر واقعہ ہے اتر گیا۔
