اسلام آباد(مانیٹرنگ ڈیسک)پاکستان تحریک انصاف (پی ٹی آئی) نے وزیراعظم نواز شریف کے خلاف 1990 کی دہائی کے الیکشن میں پاکستان مسلم لیگ (ن) کی انتخابی مہم کے لیے القاعدہ کے سابق سربراہ اسامہ بن لادن سے رقم حاصل کرنے کے الزامات کی تحقیقات کے لیے سپریم کورٹ میں ایک اور پٹیشن دائر کرنے کا فیصلہ کرلیا۔
میڈیاسے گفتگو کرتے ہوئے پی ٹی آئی کے ترجمان اور وکیل فواد چوہدری کا کہنا تھا کہ ان کی جماعت میں اندرونی مشاورت کا مرحلہ مکمل ہوگیا تھا اور تمام قانونی پہلوؤں کا جائزہ لینے کے بعد وزیراعظم اور ان کی جماعت کے خلاف ‘بیرونی قوتوں سے فنڈ حاصل کرکے جمہوریت کے خلاف سازش کرنے کے خلاف پٹیشن دائر کرنے کا فیصلہ کیا گیا۔خیال رہے کہ پی ٹی آئی نے یہ اعلان چیف جسٹس میاں ثاقب نثار کی جانب سے سیاسی جماعتوں کو ادارے کے احترام کو برقرار رکھتے ہوئے ‘سیاسی گند کو عدالتی لاؤنڈری سے صاف نہ کرنے کے مشورے کے چار روز بعد کیا ہے۔پاکستان مسلم لیگ (ن) کے رہنما حنیف عباسی کی جانب سے پی ٹی آئی کے چیئرمین عمران خان اور سیکریٹری جنرل جہانگیر ترین کی جانب سے اثاثے ظاہر نہ کرنے، آف شور کمپنیاں رکھنے اور پی ٹی آئی کے لیے بیرونی فنڈنگ حاصل کرنے کی پاداش میں نااہلی کے لیے دائر پٹیشن کی سماعت کے دوران چیف جسٹس نے کہا تھا کہ ‘امریکا میں ایک پرانی کہاوت ہے کہ سیاسی گند کو عدالتی لاؤنڈری میں صاف نہیں کرنا چاہیئے کیونکہ اس سے ادارے کی مقبولیت کو نقصان ہوتا ہے۔
