اسلام آباد(مانیٹرنگ ڈیسک)پانامہ کیس کے بعد تحریک انصاف کا وزیراعظم نواز شریف کے خلاف ایک اور عدالتی محاذ کھولنے کا فیصلہ،اصغر خان کیس میں سپریم کورٹ کے فیصلے پر عملدرآمد کیلئے آئندہ ہفتے پٹیشن دائر کردی جائے گی۔
عمران خان کی زیر صدارت بنی گالہ میں ہونے والے تحریک انصاف کے اعلیٰ سطحی اجلاس میں فیصلہ۔ ایکسپریس ٹربیون کی ایک رپورٹ کے مطابق عمران خان کی زیر صدارت بنی گالہ میں ان کی رہائش گاہ پر ہونے والے تحریک انصاف کے اعلیٰ سطحی اجلاس میں فیصلہ کیا گیا ہے کہ وزیراعظم نواز شریف کے خلاف پانامہ کیس کے بعد ایک اور عدالتی محاذ کھولا جائے جس میں تحریک انصاف سپریم کورٹ میں اصغر خان کیس میں دئیے گئے فیصلے پر عملدرآمد کے لئے اگلے ہفتے اپنے وکیل بیرسٹر فواد چوہدری کے ذریعے ایک پٹیشن دائر کریگی۔ واضح رہے کہ 2012میں سپریم کورٹ نے اصغر خان کیس میں فیصلہ دیا تھا جس پر عملدرآمد تاحال نہ ہو سکا۔ اصغر خان کیس میں مؤقف اختیار کیا گیا تھا کہ 1990کے عام انتخابات میں وزیراعظم نواز شریف سمیت دیگر سیاستدانوں نے ایک حساس قومی ادارے سے رقم وصول کی تھی۔ سپریم کورٹ نے رقم وصول کرنے والے سیاستدانوں کے خلاف ایف آئی اےکوتحقیقات کا حکم دیا تھا جس پر ایف آئی اے تحقیقات کمیٹی نے چند سیاستدانوں اور حساس ادارے کے سابق سربراہ سے تحقیقات کی تھیں جبکہ اس تحقیقات کی رپورٹ تاحال پیش نہیں کی جا سکی۔ اس بات کا امکان بھی ظاہر کیا جا رہا ہے کہ اصغر خان کیس میں دئیے گئے فیصلے پر عملدرآمد نہ ہونے پر تحریک انصاف ایف آئی اے کے خلاف توہین عدالت کی کارروائی عمل میں لانے کیلئے بھی استدعا کرے گی۔
