اسلام آباد( نیوزڈیسک)ائیرچیف مارشل سہیل امان نے پاک فضائیہ کی کمان سنبھال لی ، سبکدوش ہونے والے ائیرچیف طاہر رفیق بٹ نے اس یقین کا اظہار کیا ہے کہ نئے چیف ائیر چیف مارشل سہیل امان کی قیادت میں پاک فضائیہ ایک نئی قوت بن کر ابھرے گی۔ ائیرہیڈ کوارٹر اسلام آباد میں پاک فضائیہ کے سربراہ کی تبدیلی کی سادہ اور پروقار تقریب ہوئی۔ سبکدوش ہونیوالے ایئر چیف مارشل کو فضائیہ کے چاق و چوبند دستے نے سلامی دی۔ ائیرچیف مارشل طاہر رفیق بٹ نے گارڈ آف آنر کا معائنہ کیا۔ اس موقع پر فضائیہ کا بینڈ فضا میں مسحور کن دھنیں بکھیرتا رہا۔ ائیرچیف مارشل طاہر رفیق بٹ نے نئے ائیرچیف مارشل سہیل امان کو بیجز لگائے۔ تقریب میں مسلح افواج اور اعلیٰ سول افسران کے علاوہ غیرملکی فوجی مشن کے سربراہ بھی موجود تھے۔ ائیر چیف مارشل طاہر رفیق بٹ نے چینج آف کمان کی تقریب سے خطاب کرتے ہوئے کہا ملک کی سیکورٹی سب سے اہم ہے اور پاک فضائیہ ہر طرح کے چیلنج سے نمٹنے کے لئے تیار ہے۔ ائیرچیف مارشل طاہر رفیق بٹ نے کہا ائیرچیف مارشل سہیل امان کی قیادت میں پاک فضائیہ ایک نئی قوت بن کر ابھرے گی۔