اسلام آباد(مانیـٹرنگ ڈیسک)پاکستان کے 13سالہ طاہر نے دنیا کو حیران کردیا، ہیکرز سے بچائو کیلئے گوگل اور مائیکرو سافٹ جیسی کمپنیاں معاونت حاصل کرنے پر مجبور ہو گئیں۔ تفصیلات کے مطابق پاکستان کے شہر کراچی سے تعلق رکھنے والے 13سالہ طاہر جو کہ ایتھیکل ہیکرز ہیں اس وقت سائبر سکیورٹی کے حوالے سے دنیا کے معروف ماہرین کی صف میں شامل ہیں۔

گوگل اور مائیکرو سافٹ جیسی بین الاقوامی کمپنیوں کو سائبر سکیورٹی کے حوالے سے معاونت فراہم کرنے والے طاہر نے یہ رتبہ اپنی محنت اور شوق سے حاصل کیا، طاہر نے چھوٹی عمر میں ہی ہیکنگ سے متعلق یو ٹیوب اور دیگر ویب سائٹس پر موجود بلاگز کا مطالعہ شروع کر دیا تھا جس نے انہیں ہیکنگ کا توڑ نکالنے کا ماہر بنا ڈالا۔ طاہر اس وقت بین الاقوامی آئی ٹی فرمز اور ویب سائٹس کو سائبر سکیورٹی کے حوالے سے معاونت فراہم کر رہے ہیں۔غیر ملکی نشریاتی ادارے این بی سی کو انٹرویو دیتے ہوئے طاہر کا کہنا تھا کہ جیسے جیسے آئی ٹی انڈسٹری ترقی کرتی جا رہی ہے اسی طرح مزید قابل ہیکرز اور بڑی فرمز سامنے آرہی ہیں جس سے سائبر سکیورٹی کے حوالے سے ضروریات اور ہیکنگ کا توڑ کرنے والے ماہرین کی مانگ بڑھا دی ہے اور وہ سائبر سکیورٹی کےموجود دائرے کا ایک حصہ ہیں ۔