اسلا م آباد (نیوز ڈ یسک) سندھ حکومت نے صوبے کے ٹرانسپورٹ نظام میں بڑی تبدیلی کا اعلان کرتے ہوئے

تمام گاڑی مالکان کو 30 جون 2026 تک روٹ پرمٹس اور فٹنس سرٹیفکیٹس ڈیجیٹل کرانے کی ہدایت جاری کر دی ہے۔تفصیلات کے مطابق حکومت نے ٹرانسپورٹ شعبے کو جدید خطوط پر استوار کرنے اور جعلی دستاویزات کے خاتمے کے لیے تمام پرمٹس اور فٹنس سرٹیفکیٹس کو آن لائن نظام سے منسلک کرنے کا فیصلہ کیا ہے۔صوبائی وزیر ٹرانسپورٹ و ماس ٹرانزٹ شرجیل انعام میمن نے اس عمل کے لیے 30 جون کی آخری تاریخ مقرر کرتے ہوئے کہا ہے کہ ہر گاڑی مالک اور ٹرانسپورٹر کو تصدیق شدہ اور آن لائن دستیاب دستاویزات فراہم کی جائیں گی۔انہوں نے کہا کہ نئے نظام سے کاغذی ریکارڈ میں ردوبدل اور جعلسازی کا خاتمہ ممکن ہوگا، جبکہ شہریوں اور ٹرانسپورٹرز کو دفاتر کے بار بار چکر لگانے سے بھی نجات ملے گی۔شرجیل میمن نے متعلقہ اداروں کو ہدایت دی کہ مقررہ تاریخ کے بعد تمام دستی روٹ پرمٹس اور فٹنس سرٹیفکیٹس غیر مؤثر سمجھے جائیں گے، جبکہ صرف ڈیجیٹل دستاویزات ہی قابل قبول ہوں گی۔فیلڈ دفاتر کو روزانہ ایک ہزار اندراجات مکمل کرنے کا ہدف دیا گیا ہے تاکہ تمام عمل مقررہ وقت میں مکمل ہو سکے۔

ساتھ ہی ٹرانسپورٹرز کو بروقت آگاہ کرنے کی ہدایت بھی جاری کی گئی ہے تاکہ وہ فوری رجسٹریشن کرا سکیں۔صوبائی وزیر نے خبردار کیا کہ 30 جون کے بعد جن گاڑیوں کے پاس ڈیجیٹل کاغذات موجود نہیں ہوں گے، ان کے خلاف سخت قانونی کارروائی کی جائے گی۔ حکام کے مطابق اس اقدام کا مقصد نظام میں شفافیت لانا اور شہریوں کو بہتر سفری سہولیات فراہم کرنا ہے۔