ایڈیلیڈ (نیوز ڈیسک ) سابق ٹیسٹ کرکٹر رمیز راجہ کا کہنا تھا کہ وکٹ کیپر بلے باز سرفراز احمد کو بہت پہلے شامل کر لینا چاہیئے تھا۔ آسٹریلیا کے خلاف سرفراز احمد اگر بڑی اننگز کھیلنے میں کامیاب ہوگئے تو پاکستانی ٹیم کو اس کا بہت زیادہ فائدہ ہوگا۔ سابق کپتان نے مزید کہا کہ انہیں ٹیم منیجمنٹ کی عقل پر افسوس ہوتا ہے کہ لیگ سپنر یاسر شاہ کو بھارت کے خلاف میچ میں کھلا دیا گیا۔ یاسر شاہ وکٹ لینے والے باﺅلر ہیں انہیں آئرلینڈ کے خلاف میچ میں بھی کھلانا چاہیئے تھا۔ رمیز راجہ نے کہا کہ پاکستانی باﺅلنگ اٹیک بہت اچھا ہے جس سے تمام ٹیمیں گھبرا رہی ہیں۔ کوارٹر فائنل کے بارے میں بات کرتے ہوئے رمیز راجہ نے کہا کہ اگر پاکستانی بیٹسمین مچل سٹارک کا وار جھیل گئے تو بقیہ چالیس اوورز میں بڑا سکور ممکن ہو سکے گا۔ سابق ٹیسٹ کرکٹر کے مطابق یونس خان کو آئرلینڈ کے خلاف نہ کھلانا زیادتی تھی۔ ون ڈے میں یونس خان کو اپنے مستقبل کا فیصلہ خود کرنا ہوگا۔ مصباح الحق کو ان کی فتوحات اور ریکارڈز کے بجائے ایک خاموش اور محتاط کپتان کے طور پر یاد رکھا جائے۔