لاہور (آن لائن)جماعت اہلسنّت کے مرکزی ناظم اعلی علامہ پیر سید ریاض حسین شاہ نے کہا ہے کہ آزادی اظہار کے نام پر گستاخانہ کلچر کو پھیلانا اسلام کے خلاف عالمی سازش ہے۔گستاخانہ مواد کو سوشل میڈیا سے فوری ہٹانے کا حکم قابل تحسین ہے۔ سوشل میڈیا پر گستاخیاں کرنے والوںکو بھی آپریشن ردّالفساد کی ز د میں لایا جائے۔۔سنی اتحاد کونسل کے چیئرمین صاحبز ادہ حامد رضا نے کہا ہے کہ سوشل میڈیا پر شعائر اسلام کا
مذاق اڑانے والے فکری دہشت گرد ہیں۔نواز شریف کے خلاف لکھنے والوں کو ایک رات میں پکڑ لیا جاتا ہے مگر گستاخانہ مواد پھیلانے والوں کو کو ئی نہیں پکڑتا۔نائب امیر جماعت اسلامی ڈاکٹر فرید احمد پراچہ نے کہاہے کہ اسلام آباد ہائی کورٹ کے جسٹس شوکت عزیزصدیقی نے عاشقان رسولؐ کے دل جیت لیے ہیں ۔ تحریک حرمت رسول ﷺ میں شامل مختلف جماعتوں کے قائدین نے اسلام آباد ہائی کورٹ کی طرف سے سوشل میڈیا پر گستاخانہ مواد کی اشاعت کو دہشت گردی قرار دینے پر زبردست خراج تحسین پیش کیا اور کہا ہے کہ حکومت پاکستان گستاخانہ ویب سائٹس اور توہین آمیز مواد اپ لوڈ کرنے والے اکاؤنٹس بند کرے۔ ان خیالات کا اظہار مولانا امیر حمزہ، ڈاکٹر فرید پراچہ، سید ہارون علی ،حافظ عاکف سعید، قاری یعقوب شیخ،مولانا عبدالرئوف فاروقی، ابتسام الہٰی ظہیر، حافظ عبدالغفار روپڑی،خواجہ معین الدین محبوب کوریجہ نے کیا ۔نائب ناظم اعلیٰ منہاج القرآن علامہ سید فرحت حسین شاہ نے کہا کہ حکومت سوشل میڈیا پر نفرت انگیز اور توہین آمیز مذہبی مواد کو ہٹانے اور مانیٹر کرنے میں مکمل طور پر ناکام ہو چکی ہے ۔ امیرجماعت اسلامی پنجاب میاں مقصود احمد نے کہاہے کہ سوشل میڈیامیںگستاخانہ کو بلاک کرتے ہوئے اس گھنائونے جرم کا ارتکاب کرنے والوں کے خلاف سائبرکرائم ایکٹ کے تحت فی الفور کارروائی کی جائے۔
