بنوں(نیوز ڈیسک)خیبر پختونخوا کا جنوبی شہر بنوں شمالی وزیرستان سے نقل مکانی کرنے والے لاکھوں افراد کا میزبان شہر ہے۔ اس شہر میں اب جتنے مکان ہیں لگ بھگ اتنے ہی خیمے بھی لگ چکے ہیں جہاں بے گھر افراد سر چھپائے بیٹھے ہیں۔بنوں شہر میں داخل ہوتے وقت لنک روڈ پر دائیں بائیں خیمے ہی خیمے نظر آتے ہیں۔ کسی نے آٹھ سے دس خیموں کی بستی قائم کی ہے تو کہیں 200 سے 300 خیموں کی بستی ہے۔لنک روڈ پر اپنی مدد آپ کے تحت قائم ہونے والی ایک خیمہ بستی میں کچھ خیموں میں بنیادی سہولیات کا کوئی وجود نہیں تھا۔ نہ پینے کا پانی، نہ سردی اور بارش سے بچنے کے لیے انتظامات اور نہ اب آنے والی گرمی سے بچاؤ کا کوئی طریقہ ہے۔شمالی وزیرستان کے شہر میران شاہ سے نقل مکانی کر کے بنوں پہنچنے والا ایک دکاندار گل زر خان اب بے روزگار ہے۔ میرانشاہ میں ان کی پرچون کی دکان تھی۔ جس سے ان کا 13 افراد کا کنبہ پلتا تھا۔ اب وہ 200 کے قریب خیموں پر مشتمل ایک خیمہ بستی میں پریشان بیٹھے ہیں۔
گل زر خان نے بتایا کہ میران شاہ میں حالات بہت خراب تھے لیکن یہاں بھی حالات بہتر نہیں ہیں۔
ان کا کہنا تھا ’اس جنگل بیابان میں اس لیے رہتے ہیں کہ ان کے پاس کرائے کے پیسے نہیں ہیں، یہاں بچے بیمار ہیں، پانی نہیں ہے بچوں کی تعلیم کاکوئی پرسانِ حال نہیں ہے تو کیا کریں بس پریشانی ہے‘۔
یہاں زندگی بہت مشکل ہے ہمیں ان کے علاقے میں واپس بھیج دیا جائے جہاں کم از کم انھیں مکان کا کرایہ تو نہیں دینا پڑے گا۔ایک نوجوان محمد ناصر نے بتایا کہ وہ ابوظہبی چلا گیا تھا لیکن یہاں اپنے علاقے کے لوگوں کو ان خیموں میں دیکھتا ہوں تو تکلیف ہوتی ہے۔محمد خان بھی میرانشاہ میں دکانداری کرتا تھا۔ اپنے بچوں کو خیموں کی زندگی سے بچانے کے لیے انھوں نے دس ہزار روپے ماہانہ پر گھر کرائے پر لیا ہے۔ محمد خان نے بتایا کہ ان کی ساری جمع پونجی ختم ہو چکی ہے ’اب سمجھ نہیں آ رہا کہ کیا کروں۔‘محمد خان نے کہا کہ ’یہاں زندگی بہت مشکل ہے ہمیں ان کے علاقے میں واپس بھیج دیا جائے جہاں کم از کم انھیں مکان کا کرایہ تو نہیں دینا پڑے گا۔‘
بنوں شہر میں بڑی تعداد میں لوگوں نے سرکاری عمارتوں میں پناہ لی تھی جنھیں گذشتہ سال گرمیوں کی چھٹیوں کے بعد خالی کرا دیا گیا تھا۔ اس کے علاوہ وہ لوگ جو مکان کے کرائے نہیں دے سکتے تھے ان سب نے اب خیموں کو آباد کر لیا ہے۔ یہ سب لوگ ایک ہی مطالبہ کر رہے تھے کہ انھیں ان کے علاقے میں واپس بھیج دیا جائے۔