لاہور(این این آئی) معروف پاکستانی اداکارہ ریما کوبھی پاکستان سپر لیگ ٹو کے فائنل کا بخار امریکا سے لاہورلے آیا۔تفصیلات مطابق لاہور میں ہونے والے پی ایس ایل فائنل کو دیکھنے کے لیے جہاں حکومتی، سیاسی، سماجی شخصیات اور عوام الناس بے چین نظر آرہے تھے وہیں شوبز سے تعلق رکھنے والی شخصیات کی دلچسپی کا محور بھی بنا رہا۔اس حوالے سے پاکستان کی معروف فلمی ہیروئن ریما بھی پی ایس ایل فائنل دیکھنے کے لیے امریکا سے لاہور پہنچیں
انہوں نے فائنل میچ میں پشاور زلمی کو سپورٹ کیا۔اپنے ایک انٹرویو میں اداکارہ ریما نے کہا کہ پشاور زلمی کی سپورٹر اور ملک دشمنوں کو ناکام کرنے اور اپنی ٹیم کو سپورٹ کرنے کے لیے لاہور آئی ہوں۔انہوں نے کہا کہ فائنل کا انعقاد دشمن ممالک کے لیے بہت بڑا پیغام ہے پاکستان کودنیا کی کوئی طاقت ترقی کرنے سے نہیں روک سکتی اور لاہورمیں فائنل کا انعقاد انٹرنیشنل کرکٹ کی بحالی کی جانب اچھا اقدام ہے۔انہوں نے پی ایس ایل فائنل کا لاہور میں انعقاد کروانے کو پاکستان کرکٹ بورڈ اور حکومت کی بہترین کاوش قرار دیتے ہوئے کہا کہ ہم سب کو مل کر دہشت گردوں کو جواب دینے کی ضرورت ہے۔
