پشاور (مانیٹرنگ ڈیسک)پاکستان تحریک انصاف شدید مشکلات میں پھنس گئی۔ تفصیلات کے مطابق پاکستان تحریک انصاف میں پھوٹ پڑنے کی اطلاعات ہیں ،ایک نجی اخبار کی رپورٹ کے مطابق 18 ارکان خیبر پختونخوا اسمبلی اور 6 ایم این ایز کا وفاداریاں تبدیل کرنے کا امکان ہے۔ پاکستان مسلم لیگ (ن) کے مرکزی رہنما امیر مقام اورپاکستان پیپلز پارٹی سے تعلق رکھنے والے سابق وزیر اعظم پرویز اشرف پاکستان تحریک انصاف کے ناراض کھلاڑیوں سے رابطے میں ہیں۔

خیبر پختونخوا سے تعلق رکھنے والے مسلم لیگ ن کے رہنماءاور وزیر اعظم کے مشیر انجینئر امیر مقام اور پاکستان پیپلز پارٹی کے مرکزی رہنماءاور سابق وزیر اعظم پاکستان راجہ پرویز اشرف نے ناراض کھلاڑیوں سے رابطے تیز کر دیئے ہیں۔دونوں رہنما اس کوشش میں مصروف ہیں کہ تحریک انصاف کے ناراض کھلاڑیوں کو اپنی اپنی جماعت میں شمولیت پر رضا مند کیا جا سکے۔