اسلام آباد(مانیٹرنگ ڈیسک )پاکستان قوم کی صرف ایک شناخت ہے’’محب وطنیت‘‘،یہ پیغام وزیراعلی پنجاب میاں شہباز شریف نے سماجی رابطہ کی ویب سائیٹ ٹویٹر پر اپنے ایک ٹویٹ میں بھیجا۔انہوں نے کہا ہے کہ’’ پاکستان قوم کی صرف ایک شناخت ہے’’محب وطنیت‘‘، اِس کے علاوہ کسی نسلی امتیاز کی اجازت نہیں ۔غلط معلومات سے باز رہیے‘‘واضح رہے کہ وزیراعلیٰ پنجاب شہباز شریف کا یہ بیان اُس وقت سامنے آیا ہے جب
سوشل میڈیا پر حکومت پنجاب پریہ الزام عائد کرتے ہوئے ایک طوفان برپا ہے کہ حکومت پنجاب نے قانون نافذ کرنے والوں کو یہ ہدایات جاری کی ہیں کہ افغانیوں اور پشتونوں کے خلاف صوبے بھر میں کریک ڈاؤن کیا جائے ۔تخریب کاروں اور اُنکے سہولت کاروں کے خلاف آپریشن کو کچھ عناصر مسلسل امتیازی سلوک کا رنگ دے کرتعصب کو ہوا دے رہے ہیں جس کی حکومت پنجاب مذمت کرتے ہوئے کہنا ہے کہ دشمن غلط معلومات پھیلا کر ہمیں آپس میں لڑانا چاہتا ہے، جبکہ پشتون ہمارے بھائی ہیں اور ہمیں مل کر دشمن کی سازش کو ناکام بنانا ہے ،چند روز قبل بھی چیئرنگ کراس حادثے میں ملوث زیرحراست سہولت کار سے ہونے والے انکشافات پر وزیراعلی پنجاب نے اپنی پریس کانفرنس میں واضح کہا تھا کہ پناہ گزین افغانی ہمارے بھائی ہیں اورپاکستان نے پچھلے تیس سال سے اپنا پیٹ کاٹ کر ان بھائیوں کو بڑے سلوک کے ساتھ رکھا ہے۔ انہوں نے اِس موقع افغان بھائیوں کو مخاطب کرتے ہوئے کہا تھا کہ ہم سمجھتے ہیں کہ آپ بہت پُرامن لوگ ہیں مگر آپ کی صفوں کے اندرکچھ کالی بھیڑیں ہیں، اُن کی نشاندہی کیلئے آپ خود ہماری مدد کریں،آپ کی عزت و توقیر پاکستانیوں کی نظر میں مزید بڑھے گی،بصورت دیگر قانون حرکت میں آئے گا۔
