لاہور(آن لائن ) سُنی اتحاد کونسل پاکستان کے چیئرمین صاحبزادہ حامد رضا نے کہا ہے کہ حکومتی نااہلی کی وجہ سے بے گناہوں کا خون بہہ رہا ہے۔ فوجی عدالتوں کے معاملہ پر سیاست چمکانا ملک دشمنی ہے۔فسادیوں کیلئے آپریشن ردّ الفساد موت کا پیغام ثابت ہو گا۔ ملک میں سیکورٹی ایمر جنسی نافذ کی جائے۔ ایوانوں میں بیٹھے دہشتگردوں کے سہولت کار بھی آپریشن ردّ الفساد کی زد میں آنے چاہئیں۔ ہمارا وزیر اعظم بھارت کے
خلاف کب آواز کھولے گا۔ عوام شدید عدم تحفظ کا شکار ہو چکی ہے۔ پانی سر سے گزرنے لگا ہے او ر قوم پاک فوج کی طرف دیکھ رہی ہے۔ حکمران خاندان نے قانو ن کو ہاتھ کی چھڑی اور جیب کی گھڑی بنا لیا ہے۔ دہشتگردو ں سے فیصلہ کن جنگ کا وقت آگیا ہے۔ ان خیالات کا اظہار انہوں نے تحفظ ناموس رسالت محاذ کی اے پی سی سے خطاب کرتے ہوئے کیا ۔ صاحبزادہ حامد رضا نے مزید کہا کہ حکومت نے کل بھوشن کا معاملہ عالمی سطح پر نہ اٹھا کر مجرمانہ غفلت کا مظاہرہ کیا ہے۔پاکستان دشمن کاروائیوں کیلئے افغانستان بھارت کا ہتھیار بن چکا ہے۔ امریکہ اور افغانستان دونوں پاکستان مخالف دہشتگردوں کے خلاف کاروائی نہ کرکے امن دشمنی کا مظاہر ہ کررہے ہیں۔ معاشی دہشتگردوں کو کیفر کردار تک پہنچائے بغیر حالات ساز گار نہیں ہونگے۔ حکومت بھارت نواز دہشتگردوں کو عبرت کا نشان بنائے۔ حکومت با ر بار عوام پر مہنگائی کی بھر مار کررہی ہے۔ شریف برادران کو احتساب سے بھاگنے نہیں دیں گے۔ غربت و جہالت کے سبب نوجوان دہشتگردوں کے چنگل میں پھنستے ہیں۔ صاحبزادہ حامد رضا کا کہنا تھا کہ یہ وقت مذمتی قراردادوں کا نہیں بھارت کو دندان شکن جواب دینے کا ہے۔ آپریشن ردّ الفساد آخری دہشتگرد کے خاتمے تک جاری رکھا جائے۔ نیشنل ایکشن پلان پر عملدر آمد میں غفلت برتنے والوں کے خلاف سخت کاروائی ہو نی چاہیئے۔
