اسلام آباد (این این آئی) تحریک انصاف نے آئندہ دو ہفتے تک کوئی جلسہ جلوس نہ کرنے کا فیصلہ کیا ہے۔میڈیا رپورٹ کے مطابق چیئرمین پی ٹی آئی عمران خان نے پارٹی قیادت کو ہدایت جاری کی کہ پانامہ کیس کا فیصلہ آنے تک کوئی جلسہ نہیں ہوگا اور اسی تناظر میں چیئرمین تحریک انصاف عمران خان کا سرگودھا میں طے
شدہ خطاب بھی منسوخ کردیا گیا ہے۔صدر تحریک انصاف شمالی پنجاب عامر کیانی کے مطابق عمران خان کے خطاب کی منسوخی کا فیصلہ حکمت عملی میں تبدیلی کے باعث کیا گیا ہے۔ عامر کیانی کے مطابق پانامہ کیس کے سپریم کورٹ سے ممکنہ فیصلے کی روشنی میں آئندہ کا لائحہ عمل مرتب کر رہے ہیں ٗ منصوبہ بندی مکمل ہوتے ہی عمران خان کے شمالی پنجاب میں پروگراموں کی تفصیلات جاری کریں گے۔
