اسلام آباد (این این آئی) وزارت منصوبہ بندی و ترقی کے حکام نے کہا ہے کہ چین پاکستان اقتصادی راہداری منصوبے (سی پیک) کے تحت ساہیوال کول پراجیکٹ، پورٹ قاسم پاور پلانٹ اور کیروٹ ہائیڈرو پاور پراجیکٹ سمیت توانائی کے دیگرمنصوبوں کی قبل از وقت تکمیل سے توانائی کی ملکی ضروریات پوری کرنے میں مدد ملے گی۔
توانائی کے بڑے پیدواری منصوبے مالی سال 2017-18ء میں مکمل کرلئے جائیں گے جس کی مدد سے 5 ہزار میگاواٹ بجلی پیدا ہوگی اور بجلی کی طلب اور رسد میں موجود فرق کے خاتمہ میں معاونت حاصل ہوگی ۔حکام نے بتایا کہ کوئلے ، شمسی توانائی، ہوا اور آبی وسائل سے بجلی کی پیداوار کیلئے جامع حکمت عملی کے تحت اقدامات کئے جارہے ہیں۔ انہوں نے کہا کہ سی پیک کے وسط مدتی منصوبے 2025ء تک مکمل ہوجائیں گے ٗ لمبی مدت کے منصوبوں کی تکمیل 2030 ء تک ہوگی۔ انہوں نے کہا کہ ان منصوبوں پرجاری کام میں روز بروز اضافہ ہورہا ہے۔ انہوں نے کہا کہ سی پیک کے ترقیاتی منصوبوں کے حوالے سے توانائی کے مشترکہ گروپ میں مذاکرات کا عمل جاری ہے۔ انہوں نے کہا کہ مشترکہ تعاون کمیٹی کے چھٹے اجلاس میں فیڈریشن کے تمام شراکت داروں میں پائی جانے والی مکمل ہم آہنگی سے چینی حکومت کو مثبت پیغام گیا ہے جس سے اس کے اعتماد کو بڑھانے میں مدد ملے گی۔
