لاہور( این این آئی)صوبائی دارالحکومت لاہور میں خود کش دھماکے کے بعد پنجاب کے تین اہم شہروں میں گرینڈ آپریشن کا فیصلہ کر لیا گیا ،قانون نافذ کرنے والے اداروں کو خاص کالعدم تنظیم کے افراد کی گرفتاری کا ٹاسک سونپ دیا گیا ۔ ذرائع کے مطابق لاہور بم دھماکے کے تفتیشی اداروں کو شبہ ہے کہ خود کش حملہ آور کے ساتھی لاہور یا اس سے قریبی شہروں میں موجود ہو سکتے ہیں جس پر حساس اداروں اور پولیس پر مشتمل
ٹیموں کو فوری چھاپے مارنے کا حکم دیا گیا ہے اور دہشتگردوں اور ان کے سہولت کاروں کو گرفتار کرنے کی ہدایت کی گئی ہے ۔ ذرائع کا یہ بھی دعویٰ ہے کہ خودکش حملہ آور کے ساتھی پنجاب کے کسی بڑے شہر میں مزید تخریبی کارروائی کر سکتے ہیں اور اس حوالے سے پنجاب بھر میں سکیورٹی کو ریڈ الرٹ کر دیا گیا ہے اور دہشتگردوں اور ان کے سہولت کاروں کے خلاف آپریشن کا فیصلہ کیا گیا ہے ۔
