شیخوپورہ (آئی این پی)وفاقی وزیردفاعی پیداوار اینڈ سائنس وٹیکنالوجی رانا تنویر حسین نے کہا ہے کہ پاک بحریہ نے مشرق ومغرب کی بحری افواج کو ایک پلیٹ فارم پر اکٹھا کردیا ہے ، امن2017ایک بڑی بحری مشق ہے جس میں 37ممالک حصہ لے رہے ہیں جو پاکستان کیلئے کسی اعزاز سے کم نہیں ، امن مشقیں ایک بڑا بحری اجتماع ہے جس سے پاک بحریہ کی استعداد بڑھانے کے ساتھ ساتھ سیکھنے اور علاقائی تعاون کو بھی

فروغ حاصل ہوگا جبکہ معاشی نقل وحمل کے لئے محفوظ اور پر امن سمندری ماحول بھی درکار ہے ، امن مشقوں کیلئے پاک بحریہ کا پل کا کردارادا کرے گی ، میری ٹائم دہشت گردی ، منشیات اسمگلنگ نے عالمی توجہ حاصل کر جبکہ بین الاقوامی بحری افواج میں تعاون سے میری ٹائم سیکیورٹی پر بھی قابو پانے میں مددملے گی ، پاکستان کا بحیرہ عرب کی میری ٹائم سیکیورٹی میں بھی اہم کردارہے ۔وہ ہفتہ کو شیخوپورہ کے نواحی علاقے شامکے بھٹیاں میں وزیراعلیٰ پنجاب دیہی روڈ پروگرام کے تحت دس کروڑ روپے کی لاگت سے جی ٹی روڈ مرید کے شامکے تاکوٹ پنڈی داس سڑک کے افتتاح کے موقع پر منعقدہ عوامی اجتماع سے خطاب کر رہے تھے ۔ چیئرمین ضلع کونسل رانا عتیق انور، ارکان اسمبلی رانا افضال حسین ، پیرا شوف رسول ، حسان ریاض ، یوسی چیئرمین چوہدری ارشد ورک ، میڈیا کوآرڈینیٹر ندیم صادق گورایہ اور عقیل بھٹی نے بھی خطاب کیا ۔ وفاقی وزیر رانا تنویر حسین نے کہا کہ پاکستان ایٹمی قوت ہے ، بھارت پاکستان پر حملہ کرنے کی جرات نہیں کر سکتا ، بھارتی حکمران ہمیشہ پاکستان کی ترقی اور خوشحالی کے دشمن رہے ہیں اور آج بھی سی پیک منصوبے کو سبوتاژ کرنے کی کوشش کر رہا ہے مگر اس کے یہ مکروہ عزائم میں کبھی بھی کامیاب نہیں ہوگا ۔عمران خان کو آڑے ہاتھوں لیتے ہوئے انہوں نے کہا کہ پاکستان میں انتشار اور دھرنوں کی سیاست کر کے

عمران خان نے ملکی ترقی اور خوشحالی کی راہ میں رکاوٹ ڈالنے کا کوئی موقع ہاتھ جانے نہیں دیا ، عمران خان شیشے کے گھر میں بیٹھ کر دوسروں کو پتھر نہ ماریں ، عوام ان کے عزائم جان چکی ہے ، عمران خان کا ایجنڈا ملک وقوم کی خدمت نہیں بلکہ قوم کو تقسیم اور انتشار پھیلانا ہے اس لئے عوام نے پی ٹی آئی کو ضمنی اور بلدیاتی انتخابات میں بری طرح مستردکردیا ۔2018کے عام انتخابات کے بعد عمران خان ملکی سیاست سے قصہ پارینہ بن جائیں گے ۔انہوں نے کہا کہ وزیراعلیٰ پنجاب دیہی روڈ پروگرام کے تحت تعمیر ہونے والی سڑکوں سے صوبے کے دوردراز دیہاتی علاقوں کی شہری علاقوں تک نہ صرف رسائی ممکن ہوئی بلکہ کھیت سے منڈی تک کسانوں ،زمینداروں کی اجناس بروقت پہنچنے سے روزگار کے مواقع بھی بڑھے اور ان کی مشکلات کا بھی خاتمہ ہوا۔ دریں اثناء شامکے بھٹیاں کے عوام کے دیرینہ مطالبے پر مرید کے جی ٹی روڈ اور ہیڈبرج اور37چک میں سوئی گیس کی فراہمی کا بھی اعلان کیا ۔ (م ن)