لاہور/اسلام آباد (آئی این پی)معروف مصنفہ اور معروف ادیب اشفاق احمد (مرحوم ) کی بیوہ بانو قدسیہ 88برس کی عمر میں انتقال کر گئیں ، وہ چند روز سے اسپتال میں زیر علاج تھیں ، بانو قدسیہ کا ناول ’’راجہ گدھ‘‘ اردو کے مشہور ناولوں میں سے ایک ہے،صدرمملکت ممنون حسین اور وزیراعظم محمد نوازشریف ،وزیر مملکت اطلاعات مریم اورنگزیب اور دیگر نے معروف مصنفہ بانو قدسیہ کے انتقال پر گہرے دکھ اور افسوس کااظہار کیا اور کہا
کہ بانو قدسیہ پاکستان کا سرمایہ تھیں ۔ تفصیلات کے مطابق ہفتہ کو معروف مصنفہ بانو قدسیہ 88برس کی عمر میں انتقال کر گئیں ، وہ گزشتہ چند روز سے اسپتال میں زیر علاج تھیں ۔ بانو قدسیہ کا شاہکار ناول’’راجہ گدھ‘‘ اردو کے مشہور ناولوں میں سے ایک ہے ۔ صدرمملکت اور وزیراعظم نے ممتاز مصنفہ بانو قدسیہ کے انتقال پر تعزیت کا اظہار کیا اور اس موقع پر اپنے تعزیتی پیغام میں کہا کہ بانو قدسیہ پاکستان کا سرمایہ تھیں،ان کے انتقال سے ادب کے شعبے میں ایک بڑا خلاء پیدا ہوگیا ہے،بانو قدسیہ کی اردو ادب کے شعبے میں بے بہا خدمات ہیں۔ وزیر مملکت اطلاعات مریم اورنگزیب نے بانو قدسیہ کے انتقال پر گہرے دکھ کا اظہار کیا اور کہا کہ وہ اپنے عہد کی قد آور مصنفہ تھیں ۔ انکی وفات سے پیدا ہونے والا خلا مدتوں پر نہیں کیا جا سکے گا ۔ چیئرمین پی ٹی وی عطاء الحق قاسمی ، وزیراعلیٰ پنجاب محمد شہباز شریف، گورنر پنجاب محمد رفیق رجوانہ ، چیئرمین اکادمی ادبیات قاسم بوگھیو اور مشیر وزیراعظم عرفان صدیقی برائے ادبی ورثہ نے بانو قدسیہ کے انتقال پر گہرے دکھ اور افسوس کا اظہار کیا۔
واضح رہے کہ بانو قدسیہ معروف ادیب اشفاق احمد (مرحوم )کی اہلیہ تھیں ۔ وہ 28نومبر1928کو بھارت کے شہر فیروز پور میں پیدا ہوئیں ۔ بانو قدسیہ نے گورنمنٹ کالج اور کنیئرڈ کالج لاہور سے تعلیم حاصل کی تھی ۔
