اسلام آباد(مانیٹرنگ ڈیسک)سپریم کورٹ کے سینئر جج جسٹس عظمت سعید کو دل میں تکلیف کے باعث انسٹی ٹیوٹ آف کارڈیالوجی منتقل کیا گیا جہاں ان کی کامیاب انجیوپلاسٹی کی گئی، ڈاکٹرز نے پاناما کیس کے 5 رکنی بینچ میں شامل جج کو ایک ہفتے آرام کا مشورہ دیا ہے۔
ایک نجی ٹی وی کے مطابق جج جسٹس شیخ عظمت سعید کو اچانک دل کی تکلیف کے بعد انسٹی ٹیوٹ آف کارڈیالوجی منتقل کیا گیا جہاں ان کے مختلف ٹیسٹ لئے گئے۔اس موقع پرچیف جسٹس سپریم کورٹ آف پاکستان میاں ثاقب نثاربھی ان کے ہمراہ رہے ۔ڈاکٹرز کے مشورے کے بعد جسٹس شیخ عظمت سعید کی کامیاب انجیو پلاسٹ کی گئی، انہیں ایک ہفتے آرام تجویز کیا گیا ہے۔جسٹس شیخ عظمت سعید وزیراعظم اور ان کے خاندان کیخلاف چلنے والے پاناما کیس کے 5 رکنی بینچ کا حصہ ہیں، کیس کی سماعت کے دوران وہ کافی سخت ریمارکس بھی دے چکے ہیں۔
