ساہیوال ( آئی این پی) پاکستان تحریک انصاف ساہیوال کے زیر اہتمام شیخ ظفر علی سٹیڈیم ساہیوال میں دن کے 12بجے جلسہ عام منعقد ہوگا۔ جلسہ سے پاکستان تحریک انصاف کے مرکزی قائد عمران خان تاریخی خطاب کرینگے۔ جلسہ کی تیاریاں مکمل کرلی گئی ہیں ۔فول پروف سکیورٹی انتظامات کئے ہیں ۔ خو اتین کیلئے علیحدہ بیٹھنے کا انتظام ہے اور انکی سکیورٹی کیلئے سخت انتظامات کئے گئے ہیں۔ یہ بات تحریک انصاف کے مقامی راہنما میاں نوید اسلم نے اخبار نویسوں سے ایک ملاقات میں بتائی۔
انہوں نے بتایا کہ جلسہ میں عمران خان کے علاوہ شاہ محمود قریشی‘ جہانگیر ترین‘ چوہدری محمد سرور‘ اعجاز چوہدری‘ علیم خان ‘شفقت محمود بھی خطاب کرینگے اور ضلعی صدر فیصل جلال ڈھکو استقبالیہ خطاب کرینگے جبکہ شیخ رشید کے خطاب کا بھی امکان ہے۔ انہوں نے بتایا کہ مقامی راہنماؤں رائے حسن نواز خان‘ چوہدری نوریز شکور خان ‘چوہدری علی شکورخان ‘رانا آفتاب احمد خان‘ حاجی شیخ محمد چوہان‘ چوہدری صغیر انجم ‘ ملک محمد یار ڈھکو‘ چوہدری عمراسحاق‘ میاں انوارالحق رامے ‘شفیق احمد خان‘ میاں سجاد ناصر‘سید رضوان مظفر شاہ‘ عاطف اقبال اور دیگر مقامی قائدین جلسہ میں ہزاروں افراد کے قافلوں کے ہمراہ شریک ہونگے۔
