اسلام آباد (نیوز ڈیسک)وفاقی دارالحکومت میں تھانہ شہزاد ٹاﺅن کے علاقے سوہان میں نامعلوم موٹر سائیکل سواروں کی فائرنگ سے 2 افراد جاں بحق ہوگئے ،علاقے میں شدید خوف و ہراس پھیل گیا۔تفصیلات کے مطابق منگل کے روز اسلام آباد کے علاقے سوہان میں دو نامعلوم موٹر سائیکل سواروں نے 2 افراد اندھادھند فائرنگ کر کے موت کے گھاٹ اتار دیا اور ملزمان فرار ہونے میں کامیاب ہوگئے ، جس کے بعد علاقے میں شدید خوف وہراس پھیل گیا ،واقعہ کے بعد پولیس کی بھاری نفری اور ریسکیو ٹیمیں موقع پر پہنچ گئیں ،پولیس نے دونوں افراد کی لاشیں قبضہ میں لے لیں اور ریسکیو ایمبولینس کے ذریعے لاشوں کو ہسپتال منتقل کر دیا گیا۔پولیس حکام نے بتایا کہ جاں بحق ہونے والے دونوں افراد کا تعلق افغانستان سے ہے تاہم مزید تفتیش جاری ہے کہ آیا یہ افغان کتنے عرصہ سے اسلام آباد میں رہ رہے تھے اور ان کو کس بنیاد پر قتل کیا گیا ہے ۔دوسری جانب تھانہ شہزاد ٹاﺅنس نے نامعلوم افراد کے خلاف مقدمہ درج کر کے ملزمان کی تلاش شروع کر دی گئی۔