اسلام آباد(آئی این پی)مسلم لیگ (ق) کے سابق سینئر نائب صدر سید فقیر حسین بخاری نے جنرل (ر) پرویز مشرف اور ڈاکٹر محمد امجد کی قیادت پر اعتماد کا اظہار کرتے ہوئے آل پاکستان مسلم لیگ میں شمولیت کا اعلان کردیا۔انہیں وسیع تر سیاسی تجربے کی بنا پر آل پاکستان مسلم لیگ کا مرکزی چیف آرگنائزر مقررکردیا گیا ان کی تقرری کا نوٹیفکیشن جمعہ کو آل پاکستان مسلم لیگ کے سیکرٹری جنرل ڈاکٹر محمد امجد نے جاری کیا۔

اس موقع پر اے پی ایم ایل مرکزی پنجاب کے صدر ڈاکٹر فرخ چیمہ ،سردارمشتاق کھوسہ اور دیگر بھی موجود تھے۔واضح رہے کہ سید فقیرحسین بخاری نے اپنی سیاسی زندگی کا آغاز 1976میں کیاتھا اور وہ مسلم سٹوڈنٹ فیڈریشن کے25سال تک صدرجبکہ 15سال تک مسلم لیگ کی لیبرونگ کے صدر رہے۔وہ مسلم لیگ کی لیبر ونگ کے بانی بھی ہیں۔انہوں نے مختلف ادوار میں مسلم لیگ(ف)،مسلم لیگ (ج)، مسلم لیگ (ن) اور مسلم لیگ (ق) میں اہم نوعیت کی سیاسی ذمہ داریاں نبھائیں۔اس موقع پر گفتگو کرتے ہوئے پارٹی سیکرٹری جنرل ڈاکٹر محمد امجد نے کہاکہ اے پی ایم ایل کو مزید مظبوط اور منظم کرنے کے لئے سید فقیرحسین بخاری کے سیاسی تجربہ سے بھرپور استفادہ کیاجائے گا۔

سید فقیرحسین بخاری نے بھرپور اعتماد پر پارٹی سکرٹری جنرل کا شکریہ ادا کیا اور اس بات کا عزم کیا کہ وہ پارٹی کو مستحکم بنانے کے لئے اپنی صلاحیتوں کو بھرپورطریقے سے استعمال کریں گے۔