قاہرہ (آئی این پی )مصری حکام نے 10ہزار گدھے چین برآمد کرنے کی اجازت دے دی ہے۔ اس کے علاوہ کتوں کی کوریا کو برآمد کی بھی منظوری دی جانے والی ہے۔مصری وزارت زراعت کے زیر انتظام جنرل اتھارتی فار ویٹرینری سروسز کے سربراہ ڈاکٹر ابراہیم محروس کے مطابق طے پائے جانے والے معاہدے کے تحت چین کو گدھے برآمد کیے جانے کی منظوری دی گئی ہے۔
محروس نے مزید بتایا کہ گدھوں کی برآمد میں الازہر کے فتوے کی پاسداری کی جائے گی جس کے تحت گدھوں کو ذبح نہیں کیا جائے گا بالخصوص جب کہ چین کو گدھوں کا گوشت نہیں بلکہ صرف کھالیں چاہئیں۔دوسری جانب کوریا کی ایک کمپنی نے مصر سے کتوں کو درآمد کرنے کی پیش کش کی ہے اور اب حکام سے اس کی منظوری کے لیے بات چیت جاری ہے۔ اس پیش کش کا مقصد آوارہ کتوں کے پھیلاؤ پر روک لگانا ہے۔ جانوروں کے امور سے متعلق سوسائٹیوں نے ان کتوں کو سٹرکنین زہر کے ذریعے ہلاک کرنے سے انکار کر دیا تھا۔
