اسلام آباد(مانیٹرنگ ڈیسک) معروف مذہبی اسکالر مولانا طارق جمیل نے کہا ہے کہ جنید جمشید کی دو روز قبل ان سے بات ہوئی تھی اور جنید جمشید نے ان سے ملاقات کی خواہش کا اظہار کیا تھا۔
حویلیاں کے نزدیک پیش آنے والے حادثے میں جنید جمشید اور ان کی اہلیہ سمیت 47 افرادشہید ہو گئے تھے ۔ جنید جمشید کی شہادت پر مولانا طارق جمیل نے گہرے رنج و غم کا اظہار کیا ۔
مولانا طارق جمیل نے کہا کہ وہ بھی تبلیغ کیلئے چترال جانا چاہتے تھے لیکن مصروفیات کی بناء پر نہیں جا سکے۔ جنید جمشید جو تبلیغی دورے پر چترال میں موجود تھے وہ اہل خانہ کے ہمراہ متاثرہ طیارے سے اسلام آباد آرہے تھے۔
اطلاعات کے مطابق ، جنید جمشید نے پارلیمنٹ کی مسجد میں جمعے کا خطبہ دینا تھا۔ایک امدادی کارکن کاشف نے سرکاری ٹی وی کو بتایا کہ سرچ آپریشن کے دوران انہیں جنید جمشید کے وزیٹنگ اور شناختی کارڈز ملے۔
خیال رہے کہ پی آئی اے کی پرواز پی کے 661 میں 47 افراد سوار تھے۔جنید جمشید نے چترال میں اپنی مصروفیات کی تصاویر سماجی رابطے کی ویب سائٹ ٹوئٹر پر بھی شیئر کی تھی۔