لاہور (این این آئی)اداکاری کے میدان میں خود کو منوانے کے بعد پاکستان ٹیلی ویڑن انڈسٹری کے نئے اور معروف نام میرا سیٹھی نے ادب کے میدان میں بھی قدم رکھنے کی تیاری کرلی ہے۔مشہور پبلشنگ اداروں نوف اور بلومز بری نے میرا سیٹھی کی مختصر کہانیوں کے پہلے مجموعے کا انتخاب کرلیا اور کتاب 2018 میں امریکا، برطانیہ اور بھارت میں ریلیز ہونے کا امکان ہے۔میرا سیٹھی اس سے قبل وال اسٹریٹ جرنل کے ایڈیٹر کے طور پر ذمہ داریاں سرانجام دے چکی ہیں اور ان کا کام نیو یارک ٹائمز سمیت دا کاراوان میں بھی شائع ہوچکا ہے ٗاپنے کیرئیر میں ملنے والی اس نئی کامیابی پر میرا بہت خوش ہیں۔انہوں نے بتایا کہ جب ان کے ایجنٹ نے مسودہ روانہ کیا تھا تو وہ مسلسل دعا کررہی تھیں کہ ادارے کے ایڈیٹرز اس پر ایک نگاہ ڈال لیں۔میرا سیٹھی کے مطابق نوف کے رائٹرز جنہیں وہ کم عمری سے پڑھتی اور پسند کرتی رہی ہیں ٗوہی ادارہ اب ان کا ناشر بننے جارہا ہے، یہ بالکل خواب کے سچ ہونے جیسا ہے۔‎

موضوعات:امریکا پاکستان ٹیلی ویڑن انڈسٹری میرا سیٹھی