اسلام آباد(مانیٹرنگ ڈیسک)وزیر اعظم نواز شریف کے بچوں کے وکیل اکرم شیخ کی جانب سے سپریم کورٹ میں پارک لین فلیٹس کے متعلق جمع کرائی جانے والی اضافی دستاویز کی خبروں کے حوالے سے شریف خاندان کے ترجمان کا موقف سامنے آگیا ہے جس میں انہوں نے ایسی خبروں کی تردید کردی ہے۔
ترجمان شریف خاندان کی جانب سے جاری کیے جانے والے بیان میں کہا گیا ہے کہ پارک لین اپارٹمنٹس سے متعلق دستاویزات پیر کو سپریم کورٹ میں جمع کرانے کی بات قطعاً غلط ہے۔ حسین نوازکے وکلا کی طرف سے آج کوئی نئے کاغذات داخل نہیں کیے گئے بلکہ حقیقت یہ ہے کہ پاناما کیس میں 30 نومبر کے بعد سپریم کورٹ میں کوئی نیا بیان یا دستاویزات جمع نہیں کرائی گئیں۔
بیان میں مزید کہا گیا ہے کہ دستاویزات اپارٹمنٹس کی سیل ڈیڈ پر مشتمل ہیں اور یہ کاغذات فاضل عدالت کے سوال پر مہیا کیے گئے ہیں۔یہ بات غلط ہے کہ ایسی کوئی دستاویز ہے جس کے مطابق فلیٹس 2006 سے قبل حاصل کیے گئے۔ دستاویزصرف یہ ظاہرکرتے ہیں کہ 20 سال قبل ان 4 اپارٹمنٹس کی قیمت 19 لاکھ پاو?نڈ تھی اور یہ قیمت عمران خان کے بیانات میں بتائی جانے والی قیمت کا 100واں حصہ ہے۔
واضح رہے کہ میڈیا پر ایسی خبریں نشر ہوتی رہی ہیں جن میں کہا جارہا تھا کہ پاناما کیس میں وزیر اعظم کے بچوں کے وکیل اکرم شیخ کی جانب سے سپریم کورٹ میں اضافی دستاویز جمع کرائی گئی ہے جس میں پارک لین اپارٹمنٹنس کی خریداری سے متعلق مکمل تفصیلات بیان کی گئی ہیں ۔

موضوعات:پانامہ لیکس کیس سپریم کورٹ