کراچی (این این آئی)پی آئی اے نے عمرہ زائرین کی سہولت کیلئے رواں ماہ 11اضافی پروازیں چلانے کا اعلان کردیا۔جاری بیان کے مطابق ترجمان نے کہاہے کہ پی آئی اے عمرہ زائرین کی سہولت کیلئے رواں ماہ 11اضافی پروازیں چلائے گی جو 21 سے 30 نومبر کے درمیان کراچی، لاہور، اسلام آباد اور ملتان سے روانہ ہوں گی۔پی آئی اے نومبر کے آغاز سے جدہ کیلئے 4 ہفتہ وار اضافی پروازیں شروع کر چکی ہے جس کے بعد جدہ کیلئے پی آئی اے کی معمول کی ہفتہ وار پروازوں کی تعداد 21 سے بڑھ کر 25 ہو گئی ہے۔ترجمان نے کہا کہ یہ اقدام ائر لائن کے شعبہ مارکیٹنگ کی جانب سے عمرہ زائرین کی بڑھتی ہوئی تعداد کے پیش نظر کیا گیا ہے۔ انہوں نے کہا کہ پی آئی اے نے عمرہ سیزن کے دوران مزید اضافی پروازیں چلانے کیلئے سعودی سول ایوی ایشن اتھارٹی سے اجازت بھی حاصل کر لی ہے۔ انہوں نے کہا کہ عمرہ زائرین کیلئے پروازوں میں اضافہ اور زیادہ سے زیادہ سہولیات کی فراہمی پی آئی اے کی اولین ترجیح ہے۔

موضوعات:پی آئی اے عمرہ