اسلام آباد(مانیٹرنگ ڈیسک)بھارتی فوج کیلئے بھتہ جمع کرنے کا انوکھا طریقہ سامنے آگیا۔ راج ٹھاکرے نے فواد خان کی فلم اے دل ہے مشکل کو مشروط گرین سگنل تو دیا مگر پروڈیوسر سے یہ مطالبہ کیا ہے کہ وہ آرمی ویلفیئر فنڈ میں پانچ کروڑ روپے دے۔ انتہاء پسند ہندو نے پانچ کروڑ روپے بھتہ کی شرط صرف اے دل ہے مشکل کیلئے ہی نہیں، ہر اس بالی ووڈ فلم کیلئے رکھی ہے جس میں کوئی پاکستانی اداکار یا اداکارہ کام کرے گی۔ یوں بھارتی فوج کی ویلفیئر اب بھتے کے پیسوں سے ہو گی۔
دوسری جانب بھارتی انتہا پسند جماعت مہاراشٹر نو نریمان سینا نے بالی ووڈ ہدایت کاروں کرن جوہر اور مہیش بھٹ کو دھمکی دی ہے،کرن جوہر اور مہیش بھٹ کا نام لے کر ایم این ایس نے کہا کہ دونوں پروڈیوسرزاپنی فلموں میں پاکستانیوں کو کام نہ دیں۔ایم این ایس نے مزید کہا ہے کہ اگر کرن جوہر اور مہیش بھٹ نے پاکستانی اداکاروں کو کام دیا تو سڑکوں پر لا کر ان کی پٹائی لگائیں گے۔ایم این ایس نے اس سے پہلے پاکستانی اداکاروں کو بھارت سے نکلنے کا الٹی میٹم دیا تھا جب کہ ’اے دل ہے مشکل‘ سے فواد خان کا کردارنکلوانے کے لیے انتہا پسندوں نے کرن جوہر کے گھر کے سامنے مظاہرہ بھی کیا تھا۔بھارتی انتہاپسند تنظیم مہاراشٹر نونریمان سینا کی دھمکی پرمہیش بھٹ نے جواب دیتے ہوئے کہا ہے کہ مشتعل کیے جانے پر خاموشی خوبصورت اور باوقار جواب ہے۔