لاہو ر(این این آئی )ڈی آئی جی آپریشنز ڈاکٹر حیدر اشرف نے کہا ہے کہ تحریک انصاف کے رائیونڈ مارچ کے دوران جاتی امراء جانے والے راستوں کو کنٹینر لگا کر بند کر دیا جائیگا، پی ٹی آئی کے ساتھ مارچ کے شروع اور اختتام کے اوقات سمیت تمام ضابطہ طے ہو گا اور انہیں ممکنہ سکیورٹی خدشات سے بھی آگاہ کیا جائیگا ۔ ان خیالات کا اظہار انہوں نے گزشتہ روز ضلعی انتظامیہ اور تحریک انصاف کے وفد کے ہمراہ رائیونڈ اڈہ پلاٹ کا دورہ کے موقع پر میڈیا سے گفتگو کرتے ہوئے کیا ۔ اس موقع پر کمشنر لاہور ڈویژن عبداللہ خان سنبل ، ڈی سی اوکیپٹن (ر)محمد عثمان ،سی سی پی او لاہور کیپٹن (ر) امین وینس ،ڈی آئی جی آپریشنز ڈاکٹر حیدراشرفجبکہ پاکستان تحریک انصاف کے رہنما میاں اسلم اقبال، ولید اقبال، جمشید اقبال چیمہ ، ڈاکٹر شاہد صدیق ، شعیب صدیقی اور دیگر بھی موجودتھے۔ ڈی آئی جی آپریشنز ڈاکٹر حیدراشرف نے کہا کہ پو لیس افسران، ضلعی انتظامیہ اور پاکستان تحریک انصاف کے رہنماؤں نے رائیونڈ مارچ کی مجوزہ جگہ کا دورہ کیا ہے اور یہاں تمام سکیورٹی انتظامات کا جائزہ لیا گیا ہے، جلسہ گاہ میں عوام کے داخلی اور خارجی راستوں،پارکنگ ، خواتین کے انکلویژر ، ابتدائی طبی امداد اور تمام دیگر مطلوبہ سہولیات کا بھی جائزہ لیا گیا ہے۔امید ہے کہ ہم اسی طرح تعاون سے چلیں گے ۔ انہوں نے کہا کہ پی ٹی آئی کے ساتھ جلسہ کے شروع اور اختتام کے اوقات سمیت تمام ضابطہ طے ہوگااور اسے ممکنہ سکیورٹی خدشات سے بھی آگاہ کیا جائے گا، رائیونڈ مارچ کیلئے 6ہزار سے زائد پو لیس اہلکار تعینات کیے جائیں گے۔ انہوں نے کہا کہ جاتی امراء جانے والے راستوں کو کنٹینر لگا کر بند کر دیا جائیگا ۔ڈی سی او لاہور کیپٹن (ر) محمد عثمان نے کہا کہ پی ٹی آئی کو جلسہ کی اجازت نہ دینے کا سوال ہی پیدا نہیں ہوتا، ضلعی انتظامیہ بھی جلسہ گاہ میں تمام مطلوبہ سہولیات فراہم کرے گی۔ مارچ میں آنے کا ایک راستہ نہیں بلکہ کئی ہوں گے اس لیے امید ہے کہ شرکاء کو مشکلات نہیں ہوں گی ۔