برسبین (نیوز ڈیسک) پاکستانی کرکٹ ٹیم کے مایہ ناز اوپننگ بلے باز احمد شہزاد ورلڈ کپ میں زمبابوے کے خلاف شیڈول میچ سے قبل فٹ ہو جائیں گے۔ پاکستان اور زمبابوے کے درمیان میچ (کل) اتوار کو کھیلا جائے گا۔ متواتر دو شکستوں کے بعد کوارٹر فائنل کی دوڑ میں شامل رہنے کیلئے یہ میچ پاکستانی ٹیم کیلئے انتہائی اہمیت کا حامل ہے، شکست کی صورت میں ناک آؤٹ مرحلے میں پہنچنے کیلئے مشکلات کا سامنا کرنا پڑے گا۔ پاکستان کرکٹ بورڈ (پی سی بی) کی طرف سے جاری کردہ پریس ریلیز کے مطابق شہزاد پریکٹس سیشن کے دوران ٹخنے کی انجری میں مبتلا ہو گئے ہیں، ٹیم فزیو تھراپسٹ بریڈروبنسن نے بھی بتایا کہ ان کی انجری سنجیدہ نوعیت کی نہیں ہے اور وہ زمبابوے کے خلاف میچ سے قبل مکمل فٹ ہو جائیں گے۔ ان کی باقاعدگی سے ٹریٹمنٹ کی جا رہی ہے اور مجھے پوری امید ہے کہ وہ زمبابوے کے خلاف میچ میں بھرپور انداز میں شرکت کریں گے۔