اسلام آباد(مانیٹرنگ ڈیسک) پاکستان تحریک انصاف کے چیئرمین عمران خان نے قومی اسمبلی کی جانے والی اپنی تقریر میں وزیر اعظم کے داماد کیپٹن صفدر کو زیر جملہ طنز کا نشانہ بناتے ہوئے نواز شریف کی جانب سے جمع کروائے گئے گوشواروں کا ذکر کیا جن کے مطابق کیپٹن صفدر کا خاندان نواز شریف کے زیر کفالت ہے اور ان کے اخراجات نواز شریف پورا کرتے ہیں ۔
تفصیلات کے مطابق آج قومی اسمبلی کے اجلاس میں عمران خان کی تقریر کے دوران کیپٹن صفدر کو اس وقت شرمندگی کا سامنا کرنا پڑا جب عمران خان نے نواز شریف کی جانب سے الیکشن کمیشن کو جمع کروائے گئے گوشواروں کا حوالہ دیتے ہوئے کہا کہ نواز شریف کی جانب سے 2011 میں جمع کروائے گئے گوشواروں کے مطابق ان کی بیٹی مریم نواز شریف اور ان کا خاندان نواز شریف کے زیر کفالت ہیں اور ان کے اخراجات نواز شریف پورے کرتے ہیں ۔ جس کا واضح مطلب یہ تھا کہ کیپٹن اصفدر اپنے خاندان کی ضروریات پوری کرنے سے قاصر ہیں جو کہ پاکستانی معاشرے میں انتہائی شرمندگی کا باعث سمجھا جاتا ہے بالخصوص اس صورت میںجب ان کا اپنا کاروبار اور آمدنی کے بے شمار ذرائع بھی موجود ہیں۔
واضح رہے کہ سینئر صحافی رؤوف کلاسرا اس امر کی نشاندہی ایک نجی ٹی وی چینل کے پروگرام میں کی ان کا کہنا تھا کہ کیپٹن صفدر کی بات کو کوئی بھی سنجیدگی سے نہیں لیتا اور وہ پارٹی میں اپنی اہمیت کھو چکے ہیں ۔ انہیں کوئی بھی نہیں ملتا جب کہ وہ خود ہر ایم این اے کی سیٹ پر جا کر اس سے ملتے ہیں جس سے ظاہر ہوتا ہے کہ ان کی حیثیت پارٹی میں کافی کمزور ہو گئی ہے۔