کراچی (این این آئی)کراچی میں ہر سال معمول بنتا جا رہا ہے کہ قانونی مویشی منڈیوں کے بیوپاری اپنے کاروبار کو دوام بخشنے کے لئے قانونی طرز عمل اختیا ر کرنے کے ساتھ شہر بھر میں غیر قانونی مویشی منڈیوں میں اپنے جانور اور بالخصوص وہ جانور جو مکمل صحت مند نہ ہوں یا بیمارہوں چھوڑ دیتے ہیں تاکہ زیادہ سے زیادہ منافع سمیٹا جا سکے یہ جانور کھلے عام کراچی کی سڑکوں ، گلیوں ،محلوں میں بغیرہیلتھ سرٹیفیکٹ کے گھومتے یا قیام کرتے نظر آتے ہیں جو کہ کانگو جیسی موذی بیماری کا سبب بن سکتے ہیں، سروئیر آف کراچی نے کراچی کے علاقوں اورنگی ٹاون ، نیو کراچی، لیاقت آباد ، لانڈھی، کورنگی ،ملیر کے سروے کے ساتھ ایشیا کی سب سے بڑی مویشی منڈی جو کہ سپر ہائی وے پر موجود ہے کا سروے کیا اور اس دوران بیوپاریوں سے جو معلومات حاصل ہوئیں وہ سنسنی خیز ہونے کے ساتھ کراچی کی عوام کی صحت کے اعتبار سے لمحہ فکریہ تھیں، بیوپاریوں کے مطابق تمام قانونی مویشی منڈیوں میں جانور کا بڑا کاروبارکرنیوالوں کے جانورچاہے وہ کتنا ہی بیمار کیوں نہ ہو کسی نہ کسی طریقے سے بیچ کر جاتے ہیں اس کے لئے وہ اپنے بیمار جانور وں کو کراچی کے مختلف مقامات با لخصوص لاندھی اور ملیر کی غیر قانونی منڈیوں میں فروخت کرنے کے لئے بھیج دیتے ہیں ، ان بیمار جانوروں کو زندہ رکھنے کے لئے مخصوص ویکسی نیشن کی جاتی ہے جس سے وہ ایک ہفتے سے 15 دن تک صحت مند نظر آتے ہیں، فوری طور پر موت کی جانب گامزن جانوروں کومناسب داموں میں قصابوں کے حوالے کر دیاجاتا ہے ، سروئیر آف کراچی کی ٹیم کے مطابق اس وقت کراچی میں غیر قانونی مویشی منڈیوں کی تعداد سو سے زائد ہے جو کہ مزید بڑھے گی اس طرح کانگو وائرس کے پھیلنے کے بہت امکانات موجود ہیں کیونکہ یہ جان لیوا وائرس جانوروں کو ہاتھ لگانے کے علاوہ ان کے فضلے سے بھی پھیل سکتا ہے اس لئے میویشی منڈیوں کا رخ کرنے والے احتیاطی تدابیر لازمی اختیار کریں ، مویشی منڈی سے واپسی پر اینٹی بیکٹیریل صابن سے لازمی نہائیں ،جبکہ غیر قانونی مویشی منڈیاں لگوانے میں ضلعی انتظامیہ کے ساتھ بلدیاتی انتظامیہ برابر کی ذمہ دار ہے ابھی وقت ہے لہذا متعلقہ محکمہ جات فوری طور پر اسکا سدباب کریں ورنہ خدا نخوستہ کانگو سمیت بیمار جانوروں سے منتقل ہونے والے وائرسز سے عوام کو کسی قسم کی مشکل کا سامنا نہ کرنا پڑے ۔