کراچی (آئی این پی )نیو کراچی بلال ٹاؤن میں مبینہ طورپر سنگ دل بیوی نے اپنے ہی شوہر کو پیٹرول چھڑک کر آگ لگا دی جس سے جھلس کرشوہر ہلاک ہوگیا۔ مقتول محمد سہیل 4 بیٹیوں کا باپ تھا اور بیوی کو منانے سسرال گیا تھا۔ 37 سالہ محمد سہیل ایف بی ایریا بلاک 16 کا رہائشی تھا جو منگل کی شب روٹھی بیوی کو منانے نیو کراچی بلال کالونی اپنے سسرال گیا تو بیوی نے مبینہ طورپر اپنے گھر والوں کے ساتھ مل کر شوہر پر پیٹرول چھڑک کر زندہ جلا دیا۔ مقتول کی بہن کے مطابق سہیل کی شادی کو 15 سال ہوچکے تھے اوراس کی 4 بیٹیاں ہیں۔ سہیل کی بیوی اکثر اس سے لڑتی جھگڑتی رہتی تھی۔ اس بار لڑ کر اپنے گھر گئی تو بھائی اسے منانے اور بچوں سے ملنے گیا جہاں اسے زندہ جلا دیا گیا۔ مقتول کی بیوی کا کہنا ہے کہ سہیل اسے ہمیشہ مارتا اور دھمکاتا رہتا تھا اس بار بھی جب اس نے مارا پیٹا تو وہ تنگ آکر اپنے گھر آگئی ،سہیل کا دماغی توازن ٹھیک نہیں تھا ، اس نے اپنے آپ کو خود آگ لگائی۔ پولیس کا کہنا ہے کہ واقعے کا مقدمہ درج کر لیا گیا ہے جس میں 5 افراد کو نامزد کیا گیا ہے جبکہ مقتول کی بیوی ، سسر اور ہم زلف کو گرفتار کرلیا گیا۔ تفتیشی افسر کے مطابق مقدمے میں دیگر نامزد افراد کی گرفتاری کے لیے چھاپے مارے جا رہے ہیں۔